ब्याडमिण्टन प्रतियोगितामा प्रहरी टिम प्रथम
आइतबार, असोज २४, २०७८ मा प्रकाशित

राम प्रसाद चौहान

बर्दिया, असोज २४

सितला बजारमा भएको व्याडमिण्टन प्रतियोगितामा बर्दिया प्रहरी टिम प्रथम भएको छ । शनिबार भएको फाईनल प्रतियोगितामा प्रहरी टिमका प्रहरी सहायक निरीक्षक राम बहादुर शाही र प्रहरी जवान राजेश चौधरीको जोडी प्रथम भएको हो । प्रतियोगितामा सहभागिता जनाएका ३२ टिमलाई पराजित गरि प्रहरी टिमको जोडी प्रथम भएको छ ।

प्रतियोगितामा प्रथम भई प्रहरी टिमले रु २५ हजार पुरस्कार जितेको छ । प्रहरी टिमलाई हौसला प्रदान गर्न प्रहरी प्रमुख ईश्वर कार्की र डिएपी हेम बहादुर शाही खेल मैदानमा पुगेका थिए ।

त्यसैगरी प्रतियोगितामा गुलरियाका अनुपम न्यौपाने र सचिन चौधरीको जोडी दोस्रो भएको छ । दोस्रो हुने टिमलाई आयोजकले रु १५ हजार पुरस्कार उपलब्ध गराएको आयोजक समितिका सल्लाहकार मनोज लामिछानेले बताए ।

राईजिङ कालिका युथ क्लब सितला बजारले आयोजना गरेको ब्याडमिण्टन प्रतियोगिता सोमबार सुरु भई शनिबार फाईनल खेल भएको थियो । प्रतियोगितामा ३२ टिमले सहभागिता जनाएका थिए । जसमा बाँके र दाङ जिल्लाबाट आठ वटा टिम प्रतियोगितामा सहभागिता जनाएका थिए ।

हिन्दुहरुको महान् चाड विजयादशमीको अवसरमा ब्याडमिण्टन खेल प्रतियोगिता आयोजना गरिएको थियो ।

प्रतिक्रिया

सम्बन्धित खवर