बर्दिया, असोज २५ (फरकसमाचार)

बाघको आक्रमणबाट मृत्यु भएको पछुवा पुलिसराम थारुको परिवारलाई निकुञ्ज मार्फत हालसम्म ३० लाख ४३ हजार २ सय ३४ रुपैयाँ उपलव्ध गराएको छ । ठाकुरबाबा नगरपालिका–९ का पछुवा पुलिसराम थारु बर्दिया राष्ट्रिय निकुञ्जको हात्तिसारमा कार्यरत थिए । ०७७ साल चैत २२ गते राष्ट्रिय गैंडा गणनामा थारु खटिएका थिए ।

गैंडा गणनामा खटिएका थारुलाई बाघले आक्रमण गरी मारेको थियो ।
जोखिम मोलेर निकुञ्जमा काम गर्ने कर्मचारीको बर्दिया राष्ट्रिय निकुञ्जले बिमा गराएको थियो । मृतक थारुको नेको इन्स्योरेन्स कम्पनीमा बिमा गरिएको थियो ।

आइतबार निकुञ्जका प्रमुख संरक्षण अधिकृत विष्णु प्रसाद श्रेष्ठले मृतकका परिवारलाई रु ७ लाख ७८ हजार २ सय ३४ उपलब्ध गराएका छन् । जसमा रु ५ लाख बिमा वापत र निकुञ्जमा कार्यरत २ सय ४ जना कर्मचारीको २ दिनको तलब कट्टा गरि रु २ लाख ७८ हजार २ सय ३४ उपलब्ध गराएको प्रमुख श्रेष्ठले जानकारी दिए ।

यस्तै गरी निकुञ्जले यस अघि मृतकको परिवारलाई कार्यालयबाट मृत्यु भए लगत्तै किरिया खर्च वापत रु. ५० हजार र राहत स्वरुप रु १० लाख दिएको थियो । निकुञ्जले मृतकका अध्ययनरत २ छोरीलाई ४० हजार छात्रवृत्ती उपलब्ध गराएको थियो ।

राष्ट्रिय निकुञ्ज तथा बन्यजन्तु संरक्षण विभाग र संरक्षण साझेदार संस्थाहरुबाट रु १ लाख ७५ हजार राहत सहयोग गरिएको थियो । त्यसैगरी निकुञ्जमा कार्यरत ३२ जना करार कर्मचारीहरुको शिखर इन्स्योरेन्समा सामुहिक दुर्घटना बिमा गरिएको थियो । सो बिमा वापत मृतक परिवारलाई रु १० लाख दिएको थियो । हालसम्म मृतक थारुको परिवारलाई निकुञ्ज मार्फत जम्मा रु ३० लाख ४३ हजार २ सय ३४ उपलब्ध गराएको प्रमुख संरक्षण अधिकृत श्रेष्ठले जानकारी दिए ।