दलबहादुर सुनार
बर्दिया,मंसिर १८
३०औं अन्तर्राष्ट्रिय अपाङ्ग दिवसको अवसरमा बढैयाताल गाउँपालिकाले अपाङ्गता भएका व्यक्तिलाई सम्मान स्वरुप कृत्रिम सहयोगी सामाग्री वितरण गरेको छ । गाउँपालिकाले पाँच जनालाई सम्मान पत्रसहित कृत्रिम सहयोगी सामाग्री दिएको हो ।
शुक्रबार कोभिड–१९ पछिको संसारमा समाबेशी, पहुँच योग्य, दिगो तर्फ अपाङ्गता भएका ब्यक्तिको नेतृत्व र सहभागिता भन्ने अन्तर्राष्ट्रिय नाराका साथ दिवस मनाएको छ । यसै क्रममा बढैयताल गाउँपालिकाले दिवसको अवसरमा अपाङ्गता भएर पनि विभिन्न पेसा व्यवसायिक, उद्योगपति, स्वाबलम्बी बन्न सफल ५ जनालाई सम्मान पत्र र दोसाल्ला द्वारा सम्मान गरिएको छ ।
त्यस्तै शरिरिक अपाङ्गता भएका लागि कृत्रिम खुट्टा, कृतिमा हात, ह्विलचियर, बैसाखी लगायतका सहयोगी सामाग्री बितरण गरेको छ । बढैयाताल गाउँपालिकाकी उपाध्यक्ष दिपा कुमारी गौतमको अध्यक्षतामा र प्रमुख प्रशासकीय अधिकृत धर्मराज न्यौपानेको प्रमुख आतिथ्यमा सहयोगी सामाग्री वितरण गरिएको हो ।
प्राथमिकताको आधार अपाङ्गता भएका ब्यक्तिहरुको अधिकार भन्ने राष्ट्रिय नाराका साथमा बर्दिया जिल्लाका विभिन्न पालिकाहरुमा विविध कार्यक्रमका साथ दिवस मनाइएको छ । मधुवन, गुलरिया नगरपालिका र बढैयाताल गाउँपालिकामा दिवस मनाइएको छ ।
त्यस्तै मधुवन नगरपालिकामा महिला शाखा प्रमुख ईन्द्रा चुनाराको अध्यक्षता तथा नगर प्रमुख गणेश बहादुर केसीको प्रमुख आतिथ्यमा दिवस मनाइएको छ ।