ज्ञानेन्द्र पोख्रेल
बर्दिया,मंसिर २०
असोजको अन्तिममा परेको अबिरल वर्षाका कारण धानबाली नष्ट भई खाद्यान्नको अभाव रहेको परिवारलाई आइतबार खाद्यान्न वितरण गरिएको छ । जनजागरण महिला संघ सोरहवाको आयोजना र टेवा नेपालको आर्थिक सहयोगमा ८० घर परिवारलाई खाद्यान्न सामाग्री वितरण गरिएको हो ।
बढैयाताल गाउँपालिका–१,२ र ३ का अतिविपन्न, दलित र वादी समुदायलाई खाद्यान्न वितरण गरिएको छ । अविरल वर्षाका कारण माध्याम वर्ग किसानको पुरै धानबाली नष्ट भएको थियो ।
धानबाली नष्ट भई खाद्यान्न अभाव देखिएकोले खाद्यान्न वितरण गरेको जनजागरण महिला संघकी अध्यक्ष गोमा पौडेलले जानकारी दिईन् । ८० घरपरिवारलाई २० किलोग्राम चामल, २ किलोग्राम दाल, १ लिटर तेल, एक किलोग्राम नुन र साबुन लगायतका सामाग्री वितरण गरिएको छ । खाद्यान्न वितरणमा जनप्रतिनिधि, प्रहरी, नागरिक समाज र संचारकर्मीहरुको उपस्थिती रहेको थियो ।