दिनेश ठाकुर
बर्दिया,मंसिर २५
पञ्च वर्षिय शहरी विकास अन्र्तगतको बाटो तथा नाली निर्माणको काममा टुण्डी कन्ट्रक्सनले नाली निर्माणमा लापरवाही गरेको छ ।
गुलरिया नगरपालिका–६ मा दिपेन्द्रनगर टोलमा पर्ने नाली निर्माणमा निर्माण कम्पनिले लापरवाही गरेको हो । रिङ्गरोडमा पर्ने ठुलो कलभटको छेउमा नाली ढलान नगरी काम चलाउ मसिनो सरियाको झांप बनाई राखिएको छ ।
बिभिन्न समयमा सडक डिभिजन र स्थानीय निकायका संम्बन्धित ब्यक्तिहरु अनुगमनमा आउदा ठेकेदार कम्पनिले उक्त नाली निर्माण गर्ने बताउदै आएको र पछि निर्माण नै नगरी बेपत्ता भएको छ । नालीमाथि ढलानको काम पुरा नगरी निर्माण कम्पनिले भुक्तानी लिइसकेको आरोप छ ।
साना बालबालिकाहरु खेल्ने क्रममा धेरै पटक सरियाको जालीमा खुट्टा छिरेर दुर्घटना भएको स्थानीयले बताएका छन् । रिङ्गरोडको छेउमा रहेकोले यस ठाउँमा सवारी दुर्घटना हुने सम्भावना पनि उक्तिकै रहेको छ । सबै ठाउँमा नाली बन्दरहेको र उक्त स्थानमा खुला भएकाले घर नजिकै दुर्घन्ध भएको स्थानीयले आरोप लगाएका छन् । स्थानिय निकायमा पटक पटक उक्त नाली निर्माणमा ध्यानाकर्षण गराउँदा पनि सुनुवाई नभएको स्थानियले गुनासो गरेका छन् ।