काठमाडौं,
नेपाली काँग्रेसका महामन्त्री तथा सांसद गगन थापाले अर्थमन्त्री जनार्दन शर्मालाई यसपटक बजेट निर्माणको सवालमा अर्थमन्त्री नभएर उद्योगमन्त्री भइदिन आग्रह गरेका छन् । तीब्र आयातले मुलुक निकै कठिन अवस्थामा पुगेको जिकिर गर्दै नेता थापाले अब नेपालले उद्योग, कलकारखाना तथा उत्पादनलाई विशेष प्राथमिकता दिँदै निर्यातलाई ध्यान दिनुपर्ने बेला भएको बताए ।वि.स २०४९ देखि ५१ नै नेपालको औद्योगिक विकासको एैतिहासिक वर्ष भएको बताउँदै थापाले सोही समयको केही न केही प्रतिफल अहिले पनि मुलुकले खाइरहेको बताए । तर पछिल्लो समय यस्तो उत्पादनमुखि कुनै योजनाहरु कलकारखानाहरूको विकास एवम् विस्तार नभएको उनले बताए ।
‘अहिले नेपाल मान्छे बेचेर मालसामान किन्ने देश जस्तो भएको छ । संसारमा एक सय रुपैयाँको मालसामान किन्दा हामी मुस्किलले ९ रुपैयाँ बराबरको मात्र निर्यात गर्न सकिरहेको छौ । अब निर्यातको वस्तुहरुको खोजि गर्ने बेला आएको छ ।
त्यतातिर ध्यान दिउँ’ थापाले भने । सोही अवसरमा थापाले उत्पादन, निर्यात निर्यात मात्र भनिरहेको तर आयातमा समेत चोरि पैठारीका कारण सोचे अनुरुपको कर संकलन हुन नसकेको उनले बताए । अहिले पनि लत्ताकपडा लगायतका फेन्सी आइटममा कुल आयातको ९० प्रतिशत भन्दा बढी भन्सार छलेर आउने गरेको उनले बताए । यसलाई रोके मात्र पनि धेरै सुधार आउने उनले बताए । रातोपाटीबाट साभार