बर्दिया, साउन ९ (फरकसमाचार) / लागु औषध ब्राउन सुगरसहित प्रहरीले एक युवालाई पक्राउ गरेको छ । मधुवन नगरपालिका–८ का २१ वर्षिय अनिश थापा मगरलाई प्रहरीले सोमबार पक्राउ गरेको हो । गुलरिया नगरपालिका–११ गणेशपुर स्थितबाट प्रहरीले थापालाई पक्राउ गरेको छ ।

भे ७ प ६२४८ नंम्बरको स्कुटरमा सावर भई शंकास्पद रुपमा भारतको लौकाही बोर्डरबाट गणेशपुरतर्फ आउँदै गरेको अवस्थामा प्रहरीले थापालाई नियन्त्रणमा लिएको थियो । प्रहरीले चेकजाँच गर्दा थापाले लगाएको हाफ पाईन्टको अगाडीको भित्र पट्टी रहेको चोर खल्तीमा लुकाई छिपाई राखेको ९ सय मिलिग्राम लागु औषध ब्राउन सुगर जस्तो देखिने खैरो धुलो पदार्थ फेला परेको छ ।

थापालाई नियन्त्रणमा लिई अदालतबाट म्याद थप गरि लागु औषध मुद्दामा थप अनुसन्धान भईरहेको जिल्ला प्रहरी कार्यालय गुलरियाका प्रहरी निरीक्षक हृदेश कुमार सापकोटाले जानकारी दिए ।