बर्दिया,साउन १२ (फरकसमाचार)/ सडक दुर्घटना न्युनिकरण गर्न ट्राफिक प्रहरीले राडर गनको सहायताले सवारी साधनको गति निगरानी गर्न सुरु गरेको छ । टाढाबाटै सवारीसाधनको गति निगरानी गर्न ट्राफिक प्रहरीले राडर गनको सहायता लिएको हो । यदि तपाई पनि बर्दियामा सवारी साधन चलाउँदै हुनुहुन्छ भने आवश्य पनि तिब्र गतिमा सवारीसाधन नचालउनु होला । किन भने तपाईहरुले चलाएको सवारीको तिव्र गति ट्राफिक प्रहरीले नियालेको हुन्छ र तपाई पनि ट्राफिक प्रहरीको कारवाहीमा पर्न सक्नु हुन्छ ।

तिब्र गतिमा सवारीसाधन चलाउनेलाई ट्राफिक प्रहरीले धमाधम कारवाही गर्न सुरु गरेको छ । सवारी साधनको गति मापन गर्ने यन्त्र (राडर गन)को प्रयोगले ट्राफिक प्रहरीले टाढैबाट सवारीको गति थाहा पाउँदा चालकहरु सचेत हुने अपेक्षा गरिएको छ ।

तिब्र गतिमा सवारी साधन चलाउँदा बढी दुर्घटना भईरहेको ट्राफिक प्रहरीको ठम्याई छ । तिब्र गतिमा सवारी साधन चलाउने चालकहरुलाई कारवाहीको साथसाथै सचेत गराई सडक दुर्घटना न्युनीकरण गर्न ट्राफिक प्रहरीले सवारीसाधनको गति न्युनीकरण गराउन नयाँ प्रविधि भित्राएको छ ।

सवारीसाधनको गति मापन गर्न गत आइतबारबाट बर्दियामा राडर गनको प्रयोग गरिएको जिल्ला ट्राफिक प्रहरी कार्यालय बर्दियाका प्रमुख प्रहरी वरिष्ठ नायव निरीक्षक इश्वरी देवकोटाले बताए । ‘ओभर स्पीडका कारण बढी दुर्घटना हुने गरेको पाईन्छ’ ट्राफिक प्रमुख देवकोटाले भने,‘राडर गनको सहायताले सवारी साधनको टाढैबाट स्पीड नियाल्न सक्छौं ।’ राडर गनको सहायताले ७ सय मिटर टाढाबाटै सवारीको गति क्याप्चर गर्न सकिन्छ । राडरको प्रयोगले तिब्र गतिमा सवारी साधन चलाउनेलाई समयमै कारवाही गरि सचेत गराउन सक्छौं ।

६० भन्दा बढी स्पीडमा चलाउने सवारीसाधनका चालकहरुलाई कारवाहीको साथसाथै सचेत गराईएको छ । कारवाहीमा ५ सय देखि १ हजार ५ सयसम्म जरिवाना र तीब्र गतिमा सवारी नचलाउन सम्झाई बुझाई सचेत गरिएको छ । राडर गनको प्रयोग गरि तिव्र गतिमा सवारी चलाउने ४५ वटा साना ठुला सवारीका चालकलाई कारवाही गरिसकेको ट्राफिक प्रमुख देवकोटाले जानकारी दिए । पुर्व पश्चिम राजमार्गको बाँसगढी, भुरिगाउँ र मधुवनको सानोश्री क्षेत्रमा राडरको प्रयोग गरि सवारी साधनको गति मापन गरेका छौं । ‘बाँके ट्राफिक प्रहरीले केही हप्ताको लागि राडर गन हस्तान्तरण गरेको छ’ ट्राफिक प्रमुख देवकोटाले भने,‘केही हप्ता पछि राडर गन बाँके ट्राफिकलाई हामीले फिर्ता गर्नेछौं ।’