काठमाडौँ, साउन १८ / नौ किलो सुन प्रकरणमा मुछिएका नेकपा माओवादी केन्द्रका उपाध्यक्ष कृष्णबहादुर महराले उक्त प्रकरणमा आफ्नो संलग्नता नभएको दाबी गरेका छन्।

महराले सामाजिक संजाल फेसबुकमा आज  एक स्टाटस राख्दै आफ्नो संलग्नता नभएको दोहोर्याएका हुन्। उनले यसअघि पनि सुन प्रकरणमा आफ्नो संलग्नता नभएको बताएका थिए।

महराले फेसबुकमा स्टाटसमा चिनियाँसँग आफूले फोन नगरेको र  उल्लेख गरिएका फोन नम्बरसमेत आफ्नो नभएको बताएका छन्। उनले यस सम्बन्धमा आवश्यक परे निष्पक्ष छानबिनमा सहयोग गर्ने समेत प्रतिवद्धता जनाएका छन्। महराकाे छाेरा राहुल महराकाे नाम पनि यस प्रकरणमा जाेडिएकाे छ। तर महराले फेसबुक स्टाटसमा छाेराकाे विषयमा भने बाेलेका छैनन्। त्यसाे त प्रहरीले पनि महरा बाबुछाेरालाइ सामान्य साेधपुछ समेत गरेकाे छैन।

फेसबुकमा महरा लेख्छन्, ‘केहि दिन यता संचारमाध्यम बाट सुन प्रकरण मा मेरो नाम जोडिएर आईरहेको  बिषय यस अघि नै प्रष्ट पारिसकेको जानकारी गराउन चाहान्छु । फेरी पनि थप स्पष्ट गर्न चाहान्छु कि यस कार्यमा आफ्नो कुनै पनि संलग्नता नरहेको स्पष्ट पार्न चाहान्छु । जहा सम्म मैले फोन गरेको भनी मेरो नाम र उल्लेख गरिएको फोन नम्वर मेरो नभएको र मैले प्रयोग नगरेको पनि थप प्रष्ट पार्न चाहान्छु साथै  आवश्यक परे निष्पक्ष छानबिनमा मा सहयोग गर्ने  प्रतिबद्धता जनाउछु । अनावश्यक भ्रम मा नपर्न सबैमा हार्दिक आग्रह गर्दछु ।’नागरिकन्युजबाट साभार