राम प्रसाद चौहान

बर्दिया,साउन २८ (फरकसमाचार)/ बबई नदीमा थप एक जना गरि गुलरियाका तीन जना बेपत्ता भएका छन् । बबई नदीमा दाउरा समात्न गएको बेला आइतबार तीन जना बेपत्ता भएका हुन् ।

गुलरिया नगरपालिका–१२ भैसाहीका ३० वर्षिय बालकृष्ण थारु, गुलरिया नगरपालिका–८ थपुवाका २२ वर्षिय अक्षय चौधरी र गुलरिया नगरपालिका–२ पन्डितपुरका २७ वर्षिय महेश चौधरी बेपत्ता भएको जिल्ला प्रहरी कार्यालयका डिएसपी हिक्मत बहादुर बोहराले बताए ।

‘नदीमा दाउरा लिन गएका बेला दुवै जना बेपत्ता भएका छन्’डिएसपी बोहराले भने,‘नेपाल प्रहरी,सशस्त्र प्रहरी र नेपाली सेनाको टोली खोजतलासको लागि परिचालन भएको छ ।’ प्रहरीको संयुक्त टोली बोर्ड लिएर खोजतलासमा जुटेको डिएसपी बोहराले जानकारी दिए ।

बबई नदी चेपाङ र भादा केन्द्रमा जलसतह सतर्कता तह नजिक रहेको र बढ्दो क्रममा रहेको छ । नदी तटीय क्षेत्रमा बसोबास गर्ने सर्वसाधारणलाई प्रशासनले सतर्कत रहन अनुरोध गरिरहेको छ ।