बर्दिया,माघ १५(फरकसमाचार)/ गोठमा आगलागी हुँदा पशु चौपाया तथा धनमाल जली नष्ट भएको छ । गेरुवा गाउँपालिका–६ पर्सेनिपुर जनकटोल स्थित मुक्त बहादुर बस्नेतको गोठमा आइतबार आगलागी भएको हो ।

आगलागी हुँदा भान्साघर सहित तीन कोठे खरले छाएको कच्चि गोठमा रहेका पशु चौपाया तथा धनमाल नष्ट भएको प्रहरीले जनाएको छ । आगलागी कसरी लाग्यो खुलाईएको छैन । आगलागी हुँदा एउटा भैंसी, एउटा पाडा, ५ वटा खसीबाख्रा, १६ वटा कुखुरा, एउटा साईकल र एउटा काठको दराजलगायत धनमाल जलेर नष्ट भएको छ ।

प्रहरीका अनुसार रु ५ लाख बराबरको क्षति भएको छ । आगलागी घटना सम्बन्धमा अनुसन्धान भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।