बर्दिया,माघ १६(फरकसमाचार)/ लागु औषध ब्राउन सुगर सेवन गरिरहेको अवस्थामा प्रहरीले दुई जनालाई पक्राउ गरेको छ । मधुवन नगरपालिका–६ शान्ति टोल स्थितबाट दुई जनालाई प्रहरीले सोमबार पक्राउ गरेको हो ।

लागु औषध सेवन गरिरहेको विशेष सुचनाको आधारमा प्रहरीले दुई जनालाई नियन्त्रणमा लिएको हो । प्रहरीले दुई जनालाई नियन्त्रणमा लिई चेकजाँच गर्ने क्रममा घरको कोठाभित्र लागु औषध सेवन गरिरहेको अवस्थामा घर धनी ३७ वर्षिय मेहडी हसन अन्सारी र मधुवन नगरपालिका–८ का २९ वर्षिय प्रकाश सुनारलाई नियन्त्रणमा लिएको प्रहरीले जनाएको छ ।

साथै ३ सय ९० मिलिग्राम लागु औषध ब्राउन सुगर जस्तो देखिने खैरो पदार्थ बरामद भएको छ । दुवै जनालाई नियन्त्रणमा लिई ईलाका प्रहरी कार्यालय ढोढरीमार्फत लागु औषध मुद्दामा थप अनुसन्धान भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।