बर्दिया,जेठ १०(फरकसमाचार)/ आईपिभि खोप नपाएका बालबालिकाको लागि खोप अभियान संचालन हुदैछ । यही जेठ १३ गतेदेखि १८ गतेसम्म खोप अभियान संचालन हुने स्वास्थ्य कार्यालयद्वारा बुधबार आयोजित जिल्ला स्तरिय खोप समन्वय समिति तथा संचारकर्मीसंगको अभिमुखिकरणमा जनाईएको हो ।

विस २०७३ बैशाख महिना देखि विस २०७५ असोज महिना भित्र जन्मिएका बालबालिकालाई पोलियो रोग विरुद्धको आईपिभि खोप लगाईने स्वास्थ्य कार्यालयका प्रमुख गोकर्ण गिरीले बताए । ‘यस अवधिमा भ्याक्सिनको अभाव थियो,’प्रमुख गिरीले भने,‘जसकारण यस अवधिमा जन्मिएका बालबालिकाले यो खोप लगाउन पाएका थिएनन् ।’

अन्य बालबालिकाले यो खोप पाईसकेका छन् । यस अवधिमा जन्मिएका बालबालिका नछुट्ने गरि आईपिभि खोप लगाउने तयारी छ । बालबालिकालाई पोलियो रोगबाट बचाउनको लागि आइपिभि खोप आवश्यक छ । यो खोप लगाउँदा पोलियो हुने सम्भावना कम हुन्छ । पोलियो भाइरसले जुनसुकै उमेरका मानिसलाई संक्रमण गर्न सक्छ तर ५ वर्ष मुनिका बालबालिका बढी जोखिम हुने प्रमुख गिरीले सुनाए ।

जिल्लाभरि ३ सय ८६ खोप केन्द्र तोकिएको छ । विद्यालय र स्वास्थ्य संस्थालाई खोप केन्द्र निर्धारण गरिएको छ । नजिकको खोप केन्द्रमा गई आफ्ना बालबालिकालाई आइपिभि खोप लगाउन प्रमुख गिरीले आग्रह गरेका छन् । जिल्लामा १८ हजार ९ सय ६९ बालबालिकालाई आइपिभि खोप लगाउने स्वास्थ्य कार्यालयको लक्ष्य रहेको छ । यस खोप अभियानमा ३ सय ८६ स्वास्थ्यकर्मी र ७ सय ७२ स्वयंसेवक परिचालन हुने स्वास्थ्य कार्यालयले जनाएको छ ।

अभिमुखीकरणमा जिल्ला समन्वय समितिका प्रमुख सुर्य बहादुर बिष्ट, गुलरिया नगरपालिकाकी उप–प्रमुख सावित्रा गौतम, प्रमुख जिल्ला अधिकारी बेद प्रसाद खरेल, स्वास्थ्य कार्यालयका प्रमुख गोकर्ण गिरीलगायत संचारकर्मीहरुको उपस्थिती रहेको थियो ।