बर्दिया,जेठ ११(फरकसमाचार)/ पछिल्लो समय सामुदायिक वनमा बाघ आक्रमणको जोखिम बढेको छ । जिल्ला स्थित रहेका अधिकांश सामुदायिक वनमा बाघ देखिन थालेका छन् । सामुदायिक वनमा बाघ देखिन थालेपछि सर्वसाधारण त्रसित बनेका छन् । सामुदायिक वनसंग जोडिएको चल्ती बाटो हिड्नसमेत सर्वसाधारण डराईरहेको अवस्था छ ।

गत आइतबार मधुवन नगरपालिका–४ कालिका सामुदायिक वनमा मृत अवस्थामा पाटे बाघ फेला परेको थियो । त्यसैगरि बाँसगढी नगरपालिका–४ स्थित जनचेतना सामुदायिक वनमा बिहीबार बाघले एक महिलालाई खाएको छ । बाघले बिहीबार दिउँसो महिलालाई आक्रमण गरेको हो ।

बाघले आक्रमण गर्दा बाँके बैजनाथ गाउँपालिका–८ हस्नापुरकी ३५ वर्षिय मनिषा रोकायको ज्यान गएको छ । मृतक रोकाय आफ्नी दिदि बाँसगढी नगरपालिका–४ बठुवाकी ४० वर्षिय कैलाशपति थारुसंगै उनको घर जाने क्रममा बाघले आक्रमण गरेको थियो । बहिनी पिसाब फेर्न गएको बेला बाघले आक्रमण गरेको प्रत्यक्षदर्शी दिदिको भनाई रहेको प्रहरीले जनाएको छ ।

मृतककी दिदि थारु सकुशल रहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।