बर्दिया,जेठ १३(फरकसमाचार) / आक्रमण गरि महिलाको ज्यान लिएको नरभक्षी बाघलाई सामात्न हात्तीसहितको प्राविधिक टोली परिचालन भएको छ । बाँसगढी नगरपालिका–४ स्थित खानेपानी ट्यांकी टोल नजिकको जनचेतना सामुदायिक वनमा गत बिहीबार दिउँसै बाघले आक्रमण गरि महिलाको ज्यान लिएको थियो ।

बाघले आक्रमण गर्दा बाँके बैजनाथ गाउँपालिका– ८ हस्नापुरकी ३५ वर्षीया मनीषा रोकायको ज्यान गएको थियो । यो घटनाले पुरा गाउँ त्रसित भएको छ । बाघ सामात्न खटिएको प्राविधिक टोलीले बाघको खोजी गरिरहेको डिभिजन वन कार्यालयका प्रमुख प्रबिण बिडारीले बताए । ‘म पनि भर्खरै फिल्डबाट आएको छु,’प्रमुख बिडारीले भने,‘शनिबार ५ बजेसम्म बाघ भेटिएको छैन ।’

‘डिभिजन वन कार्यालयको समन्वयमा दुई वटा हात्तीसहित बर्दिया राष्ट्रिय निकुञ्ज र राष्ट्रिय प्रकृति संरक्षण कोषको प्राविधिक टोलीले बाघको खोजि गरिहेको छ,’प्रमुख बिडारीले भने,‘बाघलाई डार्ट गर्ने टोली पनि आईरहेको छ ।’ बाघलाई खोज्न आइतबार थप एउटा हात्ती आउने छ । बाघ सामात्न परिचालन भएको टोली सोही ठाउँमा एक दुई दिन बसेर बाघलाई डार्ट गरि उद्दार गर्ने प्रमुख बिडारीले जनाए ।

बाँसगढी नगरपालिका– ४ स्थित जनचेतना सामुदायिक वनमा सौच गर्ने क्रममा बाघ आक्रमण गरि रोकाको ज्यान लिएको थियो । केटाकेटी बाघको त्रासले सुत्दै नसुतेको स्थानीय रमा रोकाले बताइन् । ‘हामी रातभरि सुतेका छैनम्’, उनले भनिन्, ‘सामुदायिक वनमा आएको बाघले घरमै आक्रमण गर्ने त्रासले जाग्राम छौं ।’

डिभिजन वन कार्यालयका प्रमुखका अनुसार वन, निकुञ्ज र एनटिएनसीको समन्वयमा घटनास्थल वरपर जडान गरिएको अत्याधुनिक क्यामरामा बाघ कैद भइसकेको छ । ‘घटना भएलगत्तै बाघ बस्न सक्ने सम्भावित क्षेत्रमा क्यामरा जडान गरेका थियौं’, उनले भने, ‘बाघले घटना गराएको ठाउँमा जडान भएको क्यामरामा बाघ कैद भइसकेको छ ।’

क्यामरामा कैद भएको बुढो पोथी बाघ रहेको खुलिसकेको छ । बाघ घटनास्थल नजिक घुमिरहेकाले अर्को अप्रिय घटना नहोस् भन्ने उद्देश्यले सजगता अपनाएको प्रमुख जिल्ला अधिकारी वेदप्रसाद खरेलले बताए । ‘बाघ घुमिरहेको स्थानमा आवागमन रोक लगाएका छौं’, घटनास्थल पुगेर फर्कंदै गरेका प्रजिअ खरेलले भने, ‘उद्धार गरेर बाघलाई सुरक्षित स्थानतर्फ लैजाने तयारी भइरहेको छ ।’ बर्दिया निकुन्ज क्षेत्रभन्दा बाहिर बाघको आक्रमणबाट पाँच जनाको ज्यान गइसकेको छ ।