बर्दिया,जेठ १५/ ठाकुरबाबा नगरपालिकाले द्वन्द्व पीडित महिला तथा बालिकाको समष्टिगत आवश्यक पहिचान शुरु गरेको छ । ठाकुरबाबा नगरपालिकाकी उप–प्रमुखको संयोजकत्वमा पाँच सदस्य उपसमितिले आइतबार देखि द्वन्द्व पीडित महिला तथा बालिकाको आवश्यकता पहिचान गर्न शुरु गरेको हो ।

महिला, शान्ति र सुरक्षा सम्बन्धी संयूक्त राष्ट्र संघको प्रस्ताव नं. १३२५ र १८२० लाई लागु गर्न नेपाल सरकारले ल्याएको दोस्रो राष्ट्रिय कार्य योजनामा स्थानीय तहलाई दिएको जिम्मेवारी अनुसार द्वन्द्व पीडित महिला तथा बालिकाको समष्टिगत आवश्यक पहिचान शुरु गरिएको छ । दोस्रो राष्ट्रिय कार्य योजनामा स्थानीय तहका प्रमुखको संयोजकत्वमा कार्ययोजना कार्यान्वयन स्थानीय समिति र पीडित तथा प्रभावित महिला तथा बालिकाको समष्टिगत आवश्यकता पहिचान उपसमिति ब्यवस्था भए अनुसार दुबै समिति गठन भई सकेको छ ।

राष्ट्रिय कार्ययोजनामा दिएको जिम्मेवारी अनुसार ठाकुरबाबा नगरपालिकाले आवश्यकता पहिचान गर्न शुरु गर्नु अगाडी, पहिचान गर्ने क्रममा पछिको गोपनियता, सुरक्षा संवेदनशिलतालाई सुनिश्चित गर्न आचारसहिता र आवश्यकता पहिचान गर्न फारम बनाएर कार्ययोजना स्थानीय समितिको आइतबार बसेको बैठकले पास गरेको छ । ठाकुरबाबा नगरपालिकाका नगर प्रमुख तिलकराम लम्सालले पीडित तथा प्रभावित महिला तथा बालिकाको समष्टिगत आवश्यकता पहिचान उपसमितिका पदाधिकारीलाई गोपनियता तथा संवेदनशिलता सम्बन्धी सपथ ग्रहण गराएका छन् ।

नगर प्रमुख लम्सालले गोपनियता र सुरक्षा संवेदनशिलतालाई ध्यानमा राखि पाएको जिम्मेवारी इमान्दारीपुर्वक पुरा गर्न निर्देशन दिएका छन् । साथै कार्ययोजना कार्यान्वयन स्थानीय समितिले आवश्यक स्रोत ब्यवस्थापन गर्न कार्यपालिकामा प्रस्ताव लगि आवश्यक नितिगत निर्णय गर्ने नगर प्रमुख लम्सालले प्रतिबद्धता व्यक्त गरेका छन् ।

ठाकुरबाबा नगरपालिकाकी उप–प्रमुख द्वन्द्व पीडित तथा प्रभावित महिला र बालिकाको समष्टिगत आवश्यकता पहिचान उपसमितिकी संयोजक बिना भट्राईले द्वन्द्व पीडित महिला तथा बालिकाको आवश्यकता पहिचान गरी कार्ययोजना कार्यान्वयन समितिलाई हस्तान्तरण गर्ने बताईन । पहिचान गरिएका आवश्यकतालाई प्राथमिकिकरण गरी ठाकुरबाबा नगरपालिका आफै, प्रदेश र संघीय सरकारलाई योजना बनाउन सिफारिस गर्ने जनाईन् ।

द्वन्द्व पीडित महिला तथा बालिकाको आवश्यकता पहिचान गर्न यूरोपियन यूनियनको आर्थिक सहयोगमा द स्टोरी किचेन र द्वन्द्व पीडित समिति बर्दियाले साहास ३.० परियोजना अन्र्तगत सहजिकरण तथा प्राविधिक सहयोग गरिरहेको छ ।