बर्दिया,जेठ १७(फरकसमाचार)/ विगत केही दिन देखि अत्याधिक गर्मी बढेको छ । बढेको गर्मीले जनजिवन प्रभावित भएको छ । बढेको गर्मी केही दिन कायम रहने जल मौसम कार्यालयले जनाएको छ । अत्याधिक बढेको गर्मीले दैनिक मजदुरी गर्नेको दैनिकी कष्टकर बनाएको छ । मजदुरी गर्न निकै कठिनाई भईरहेको छ ।

गर्मी बढेपछि बिषालु सर्पको बिगबिगी भएको छ । मधुवन नगरपालिका–५का शंकर बिकलाई बुधबार बिहान बिषालु सर्पले टोकेको छ । विकको उपचार बर्दिया अस्पतालमा सम्भव नभएपछि नेपालगंज रिफर गरिएको छ । गर्मीका कारण सर्प बाहिर निस्केका छन् । यस अवस्थामा सबै जना सजग रहन जरुरी छ । त्यसैगरि गर्मी छल्न नदी, पोखरी र स्विमिङ पुलमा नुहाउने क्रम बढेसंगै दुर्घटना हुने जोखिम पनि बढेको छ । गुलरिया नगरपालिका स्थित रहेको कृष्णसार रिसोर्ट प्रालीको स्विमिङ पुलमा पौडी खेल्ने क्रममा डुबेर मंगलबार मथुराका १६ वर्षिय अरबिन्द यादबको मृत्यु भएको छ । यी ठाउँमा पौडी खेल्न वा नुहाउन जादाँ सतर्कता अपनाउन जिल्ला प्रशासन कार्यालयले अनुरोध गरेको छ ।

त्यसैगरि गर्मीले बजारमा उपभोक्ताको चहल पहलमा कमी आएको छ । व्यापारीहरुको बिक्री बट्टा शून्य जस्तै भएको छ । बढेको गर्मीका कारण उपभोक्ताहरुको बजारमा उपस्थिती पातलिदै गएको व्यापारीहरुले सुनाउँछन् । गर्मीले मासिहरुको स्वास्थ्यमा प्रत्यक्ष असर पारेको छ । गर्मीले पेट दुख्ने, टाउँको दुख्नेलगायतका विरामी अस्पतालमा भर्ना भईरहेका छन् । यता देशभरको तापक्रमको अवस्थाको विश्लेषण अनुसार तराईका भुभागमा अत्याधिक गर्मी हुने जल मौसम कार्यालय कोहलपुरले जनाएको छ । जेठ १८ गतेसम्म तातो हावा चल्ने हुनाले आवश्यक सतर्कता अपनाउन जल मौसम कार्यालयले अनुरोध गरेको छ ।

गर्मीले तर्बुजाको माग बढ्यो

अत्याधिक गर्मीले तर्बुजाको माग बढेको छ । गर्मीमा तर्बुजा खेती गर्ने किसानहरु तर्बुजा बेच्न अस्त व्यस्त बनेका छन् । गुलरिया नगरपालिका–४ बगहीकी ४० वर्षिय मन्तुरिया थारुलाई तर्बुजा बेच्न चटरो छ । जब्दीघाट स्थित ३ कट्टा बगरमा माघ महिनामा लगाएको तर्बुजाले अहिले राम्रै आम्दानी दिएको उनले बताईन् । ‘बिहान गाउँ गाउँमा बेच्च जान्छु,’उनले भनिन्,‘ साँझ जब्दी पुल नजिक बाटोमै बसेर बेच्छु ।’ खेतबाटै पनि बिक्छ । प्रति केजी रु ३० देखि ४० सम्म तर्बुजा बिचिरहेको उनले जनाईन् ।

विद्यालय बन्द

केही दिनयता अत्याधिक गर्मी बढेपछि नगरपालिका अन्तर्गतका सम्पुर्ण विद्यालयहरु तीन दिन बन्द गर्ने गुलरिया नगरपालिकाले निर्णय गरेको छ । गुलरिया नगरपालिका अन्तर्गतका सामुदायिक तथा संस्थागत विद्यालय भोली जेठ १६ गते(बुधबार) देखि जेठ १८ गते(शुक्रबार) सम्म बन्द रहने छन् । केही दिन देखि यता बढी रहेको अत्याधिक गर्मीका कारण विद्यार्थीहरुको स्वास्थ्यमा प्रतिकुल असर परिरहेको तथा पठनपाठन गर्नमा असहज भएपछि नगरपालिकाले विद्यालय बन्द गरेको छ ।

सरकारी कार्यालयमा सेवाग्राही घटे

गर्मी बढेपछि भिडभाड हुने सरकारी कार्यालयहरुमा सेवाग्राहीको उपस्थिती न्युन देखिएको छ । अत्याधिक गर्मीका कारण सेवाग्राही घरबाट ननिस्केको अनुमान गरिएको छ । प्रचण्ड गर्मीका कारण अत्यावाश्यक काम बाहेक सर्वसाधारण बाहिर निस्केका छैनन् ।

गर्मीले स्वास्थ्यमा देखा पर्ने समस्या र अपनाउने उपाय

तातो हावा तथा तातो लहरबाट थकाइ लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर आउने, बेहोस हुने, मांसपेशी दुख्ने, बान्ता आदि असर हुनसक्ने देखिएकाले सोबाट बच्न मौसम पुर्वानुमान महाशाखाले अनुरोध गरेको छ । तातो हावा तथा तातो लहरबाट बच्न गर्मीको समयमा घरभित्र अर्थात् चिसो स्थानमा रहने, बाहिरी वातावरणमा बढी नजाने, हल्का लुगा लगाउने, सुती कपडा लगाउने, बाहिर निस्कँदा टाउको छोप्ने, टोपी लगाउने, नियमित पानी तथा झोल पदार्थ (जुस, सर्वत) आदि प्रशस्त मात्रामा पिउन महाशाखाले आग्रह गरेको छ ।