बर्दिया,जेठ २२(फरकसमाचार)/ यदि तपाई सामाजिक संजालमा भाईरल बनेको कर्णाली नदीको जलयात्रा सवार गर्ने सोचमा राजापुर जादै हुनुहुन्छ भने नजादै बेस होला । राजापुर स्थित सत्ति घाटमा संचालित साहासिक जलयात्रा बन्द भएको लामो समय भईसकेको छ । कहिल्य संचालनमा आउँने समयको समेत टुंगो छैन ।

छोटो समय संचालनमा आएको साहासिक जलयात्राको सेवा राजापुरमा बन्द छ । तत्कालिन लुम्बिनी प्रदेश शहरी विकासमन्त्री कृष्णा केसी, नगर प्रमुख दिपेश थारुले जलयात्राको उद्घाटन गरेका थिए । केसीलाई लुम्बिनी प्रदेश सरकारले उर्जा, जलस्रोत तथा सिँचाई मन्त्रीको रुपमा सोमबार नियुक्त गरेको छ । लाखौ लगानी गरेर संचालनमा ल्याएको र त्यसको प्रभावकारीता बढिरहेको अवस्थामा जलयात्रा बन्द गरिएको छ । नगर प्रमुख दिपेश थारुका अनुसार उक्त जलयात्रा सवारका लागि प्रयोग हुने मोटरबोटका सामान चोरी भएकाले तत्काल जलयात्रा संचालनमा आउँने देखिदैन । कर्णाली नदी किनारमा राखिएको मोटरबोटको महत्वपूर्ण सामान चोरी भईसकेको छ । कर्णाली नदीमा डल्फिनको मोभमेन्ट हेर्दे रियल जलयात्राले सबैको ध्यान खिचेको थियो ।

दैनिक ३ सय जनालाई जलयात्रा गराएर मनोरन्जन दिलाउँने उदेश्यले संचालनमा गरिएको साहासिक जलयात्रा लाखौ लगानी बालुवामा पानी हाले सरह भएको छ । युएसएआईडीको तयार नेपाल परियोजनाबाट बाढीको समयमा खोज तथा उद्दार गर्न र अन्य समयमा पर्यटन प्रबद्र्धनमा सहयोग पुग्ने उदेश्यले उपलब्ध गराईएको मोटरबोट संचालन कार्यविधि बनाएर राजापुर नगरपालिकाले चलाएको थियो ।
त्यस्तै किसिमको जलयात्रा टिकापुरमा बन्द गरिएको छ । जसले गर्दा जलयात्रामा सहभागी हुने जाने आन्तरिक पर्यटकले निराश भएर फर्किरहेका छन् ।

सामाजिक संजालमा गरिएको पोष्टमा आर्कषक देखिने कर्णाली नदीको साहसिक जलयात्राको पाटोमा पूर्ण विराम लागेको छ । केहि महिना संचालनमा आएको मोटरबोटबाट गराईने जलयात्रा बन्द भएको छ । जलयात्राका लागि टाढा टाढाबाट जाने आगन्तुक निराश भएर फर्कने गरेका छन् । सुरुमा टिकापुर पार्कमा शुरु गरिएको जलयात्रा तयार नेपालको सहयोगमा राजापुर नगरपालिकाले मोटरबोट ल्याएर राजापुर नगरपालिकाले संचालन गरेको गरेको थियो ।

गर्मी मौसमा कर्णालीका विच भागमा मनोरन्जनात्मक तरिकाले गराईने जलयात्राले आगन्तुक वा आन्तरिक पर्यटकको मन खिचेको थियो । साहासिक जलयात्राले जति छिटो आगन्तुकको मन तान्यो त्यति नै छिटो सेवा बन्द गरिएको छ । उक्त जलयात्रा सामाजिक संजालमा फेसबुक र टिकटकमा आन्तरिक पर्यटकले पोष्ट गर्दा पछिल्लो समय भाईरल बनेको जलयात्रा किन बन्द भयो भने बिषयमा चासो लिइएको छ ।