बर्दिया,जेठ २३(फरकसमाचार)/ गर्मीमा गरिब तथा अति विपन्न परिवारलाई अत्यावश्यक राहत सामाग्री वितरण गरिएको छ । गुलरिया नगरपालिका–३,४ र ८ का १ सय ५० घर परिवारलाई मंगलबार अत्यावश्यक राहत सामाग्री वितरण गरिएको हो ।

स्टार्ट फण्ड नेटवर्क, कतार च्यारिटी, युकेएडको आर्थिक सहयोग, बाँके युनेस्को क्लवको साँझेदारी र गुलरिया नगरपालिकाको समन्वयमा तराईमा पुर्वानुमानित ‘लु’को पुर्वकार्य परियोजनाले अति विपन्न परिवारलाई खाद्य तथा अत्यावश्यक राहत सामाग्री वितरण गरेको छ । गुलरिया नगरपालिकाका नगर प्रमुख मुक्तिनाथ यादवको उपस्थितीमा राहत सामाग्री वितरण गरिएको छ ।

प्रत्येक परिवारलाई मुल्य रु ४ हजार ३ सय ५० बराबरको खाद्यन्न सामाग्री र मुल्य रु १ हजार ४ सय ६ बराबरको छाता, झूल, चप्पल, गम्छा र झोला वितरण गरिएको जनाईएको छ । गुलरिया नगरपालिकाले उपलब्ध गराएको तथ्यांकको आधारमा अत्यावश्यक राहत सामाग्री वितरण गरिएको तराईमा पुर्वानुमानित ‘लु’को पुर्वकार्य परियोजनाका कार्यक्रम संयोजक साजिद अलि सिद्दिकीले जनाए ।

अत्याधिक बढेको गर्मीले जनजिवन प्रभावित भएको बाँके युनेस्को क्लवका कार्यक्रम संयोजक गोविन्द प्रसाद लामिछानेले बताए । ‘दैनिक ज्याला मजदुरी गर्ने व्यक्तिहरु गर्मीको प्रत्यक्ष मारमा परेका छन्,’संयोजक लामिछानेले भने,‘ केही दिन देखि बढेको अत्याधिक गर्मीले दैनिक ज्याला मजदुरी गर्न कठिनाई भईरहेको छ ।’

गर्मीका कारण अति विपन्न परिवारलाई भोकमरी जस्तो समस्यासंग जुध्न नपरोस् भन्ने उदेश्यले अत्यावश्यक सामाग्री वितरण गरिएको छ ।’ त्यसैगरि गुलरिया नगरपालिका अन्तर्गत रहेका शम्भुशरण मावि र जानकी माविमा अध्ययनरत एक हजार विद्यार्थीलाई छाता, बोतल, ग्लुकोज र जीवनजल वितरण गरिएको कार्यक्रम संयोजक लामिछानेले जानकारी दिए ।