बर्दिया,जेठ २४(फरकसमाचार) / जिल्लामा शान्ति सुरक्षा कायम गर्दै सरकारी कार्यालयलाई सेवाग्राही मैत्री बनाउने प्रमुख जिल्ला अधिकारी रुद्रादेवी शर्माले बताएकी छन् । सोमबार प्रजिअको जिम्मेवारी सम्हालेकी शर्माले बुधबार पत्रकारसंगको भेटघाटमा यस्तो बताएकी हुन् ।

शान्ति सुरक्षाको प्रत्याभूती गराउदै जिल्ला स्थित रहेका सरकारी कार्यालयबाट हुने सेवा प्रवाह र सुशासनमा प्राथमिकता दिने प्रजिअ शर्माले बताईन् । ‘जिल्ला प्रशासनमा नागरिकता, परिचयपत्र र राहदानी सेवा लिनेको भिडभाँड देखिएको छ,’प्रजिअ शर्माले भनिन्,‘यसलाई व्यवस्थापन गर्न टोक्कन प्रणालीको व्यवस्था र गुनासो सुन्नको लागि टोल फ्रि नंम्बरको तत्काल व्यवस्था गर्नेछु ।’

त्यसैगरि जिल्ला प्रशासन कार्यालयमा आउने अपांङ, अशक्त, जेष्ठ नागरिक, गर्भवती महिला र दूधे बच्चा लिएर आएका महिलाहरुलाई सेवा प्रभावमा सहजीकरण गर्ने जनाईन् । जिल्ला प्रशासनलगायत जिल्ला स्थित अन्य सरकारी कार्यालयबाट प्रवाह हुने सेवालाई प्रभावकारी बनाउने विश्वास दिलाईन् ।

जिल्ला स्थित रहेका सरकारी कार्यालयका प्रमुखहरुसंग नियमित बैठक बस्ने, सुचना अधिकारी तोक्ने, नियमित अनुगमन गरेर कार्यालयमा नियमितता,अनुशासनका कुराहरु नियमन र निर्देशन गर्ने सुनाईन् । उपभोक्ता हितको लागि योजना बनाएर बजार अनुगमन गर्ने प्रजिअ शर्माले बताईन् । ‘नियमित बजार अनुगमन गरेर अखाद्य पदार्थ नियन्त्रणमा लिनेछौं,’प्रजिअ शर्माले भनिन्,‘कानुन विपरीत काम गर्नेलाई कारवाही गर्नेछौं ।’

विपद व्यवस्थापनमा पुर्व तयारी भईरहेको छ । यसलाई तिब्र पार्न पालिकाहरुसंग बसेर तत्काल तयारी गर्ने छौं । सिमा सुरक्षासंग जोडिएका अपराध चोरी तस्करी लागु औषध नियन्त्रणको लागि विओपी अनुगमन गरिरहेको खुलाईन् । जिल्ला स्थित सबै बिओपी र चौकीको अनुगमन गरेर आवश्यक काम गर्ने तयारी रहेको भनाई राखिन् । विषेशगरि राजश्व चुहावटलाई नियन्त्रण गरेर राजश्व वृद्धि गर्ने तर्फ लाग्नेछौं ।

जिल्ला स्थित संघ, प्रदेश र स्थानीय तहले गरेका विकास योजनामा शान्ति सुरक्षाको व्यवस्था र अलपत्र रहेका आयोजना किन अलपत्र रहेको आयोजना प्रमुख र निर्माण व्यवसायीसंग बसेर बुझ्ने प्रजिअ शर्माले बताईन् । ‘जनतालाई न्याय दिलाउन र कानुनको कार्यान्वय गर्ने कुरामा प्रतिबद्ध र निश्पक्ष भएर लाग्ने छु,’प्रजिअ शर्माले भनिन्,‘यसमा सबैसंग समन्वय र सहकार्य गरि अघि बढ्ने छु ।’ प्रजिअसंगको भेटघाटमा जिल्लाको वस्तुस्थिती र समसमायिक विषयमा संचारकर्मीहरुले औल्याएका थिए ।