बर्दिया,जेठ ३(फरकसमाचार)/ लागु औषध ब्राउन सुगरसहित प्रहरीले दुई जनालाई पक्राउ गरेको छ । बढैयाताल गाउँपालिका–२ फुटाहा स्थितबाट बाँसगढी नगरपालिका–६ का २४ वर्षिय शिशिर भण्डारी र २० वर्षिय निरज थारुलाई प्रहरीले आइतबार पक्राउ गरेको हो । दुवै जना भारततर्फबाट नेपालतर्फ शंकास्पद रुपमा साइकलमा आईरहेको अवस्थामा प्रहरीले नियन्त्रणमा लिई चेकजाँच गरेको थियो ।

चेकजाँचको क्रममा साइकलको हेण्डलमा सेतो रंङको प्लाष्टिकको पुडियामा लुकाई छिपाई राखेको लागु औषध प्रहरीले फेला पारेको छ । प्रहरीका अनुसार ४ सय ४० मिलिग्राम लागु औषध ब्राउन सुगर जस्तो देखिने खैरो धुलो पदार्थ बरामद भएको छ ।

दुवै जनालाई नियन्त्रणमा लिई आवश्यक अनुसन्धान भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए । त्यसैगरि गत बिहीबार बढैयाताल गाउँपालिका–८ स्थितबाट बाँसगढी नगरपालिका–९ माछागढका २२ वर्षिय खडक बहादुर थापा र २६ वर्षिय रमेश थारुलाई ४ ग्राम ८ सय मिलिग्राम लागु औषधसहित प्रहरीले पक्राउ गरेको थियो ।