बर्दिया,असार ६(फरकसमाचार)/ कुखुरा व्यवसायी बिच पोलापोलको प्रतिस्पर्धा चल्दा अबैध कुखुरा धमाधम बरामद भईरहेको छ । अधिकांश कुखुरा व्यवसायीले नै भारतबाट अबैध रुपमा कुखुरा ल्याउने गरेको तथ्य सार्वजनिक भएको छ । कुखुरा व्यवसायी बिच द्वन्द्व चल्दा कुखुरा तस्कारीको जानकारी प्रहरी समक्ष पुग्ने गरेको छ । कहिले अबैध कुखुरा त कहिले कुखुराको मासु नियन्त्रणमा लिएको प्रहरीले प्रेस विज्ञप्ती जारी गर्छ । एकले अर्कोलाई पक्राउ गराउने कार्यले अबैध कुखुरा भित्रिने सम्भावना कम देखिएको छ ।

मंगलबार प्रहरीले बुझाएको अबैध कुखुरा नष्ट गरिएको पशु क्वारेन्टाईन चेक पोष्टका प्रमुख नारायण प्रसाद पोखरेलले बताए । ‘मोटरसाइकल र मानिसलाई भन्सार कार्यालयमा बुझाएका छौं,’चेक पोष्टका प्रमुख पोखरेलले भने,‘अस्ति एक गाडी हालेको हो ।’ अधिकांशले अबैध कुखुरा ल्याईरहेको प्रमुख पोखरेलले बताए । ‘कुखुरा ओसार पसार गर्दा स्वास्थ्य प्रमाणपत्र चाहियो,’ प्रमुख पोखरेलले भने,‘स्वास्थ्य प्रमाणपत्र बनाउन बिल चाहियो ।’ नत्र एक जिल्लाबाट अर्को जिल्लामा कुखुरा ओसारपसार गर्न पाईदैन । स्वास्थ्य प्रमाणपत्र र बिल नभएको अवस्थामा कुखुरा अबैध मानिने प्रमुख पोखरेलले जनाए ।

बढैयाताल गाउँपालिका–४ खैरेनी स्थितबाट प्रहरीले अबैध कुखुरासहित तीन जनालाई मंगलबार प्रहरीले नियन्त्रणमा लिएको थियो । पक्राउ पर्नेमा बाँसगढी नगरपालिका–४ का ३२ वर्षिय महादेव थारु, बढैयाताल गाउँपालिका–४ का ३८ वर्षिय प्रेमलाल थारु र वडा नंम्बर ५ का २३ वर्षिय जस्बीर वली रहेका छन् । तीनै जनाले तीन वटा मोटरसाइकलमा कुखुरा राखी भारततर्फबाट नेपालतर्फ ल्याउँदै गरेको अवस्थामा प्रहरीले नियन्त्रणमा लिएको जनाएको छ ।

प्रहरीका अनुसार बरामद ब्रोईलर कुखुरा ३५ वटा बजार मुल्य रु २६ हजार ४ सय बराबरको छ । फेला परेको कुखुरा, बोक्न प्रयोग गरिएको मोटरसाइकलसहित तीन जनालाई नियन्त्रणमा लिई आवश्यक कारवाहीको लागि पशु क्वारेन्टाईन कार्यालयमा बुझाएको जिल्ला प्रहरी कार्यालय गुलरियाका डिएसपी तुल्सीराम अर्यालले जनाएका थिए ।