नदी तटिय क्षेत्रका बासिन्दालाई सधैं बाढीको त्रास
सोमबार, असार २५, २०८१ मा प्रकाशित

बर्दिया,असार २४(फरकसमाचार)/ अविरल वर्षातका कारण बबई (भादा)नदिमा पानीको सतह बढेको छ । दाङलगायतका जिल्लामा भएको अविरल वर्षाले बबई नदिमा पानीको सतह बढेको हो ।

नदीमा पानीको सतह बढेर आइतबार दिउँसो गुलरिया नगरपालिका–११ स्थित इन्द्रपुर भादा पुल नजिक बाँध भत्काएको छ । पानीले बाँध भत्काउदा स्थानीय त्रसित बनेका छन् । नदि तटिय क्षेत्रका गाउँ बस्तीमा बाढी पस्ने उच्च सम्भावना रहेको छ । नदिमा पानीको सतह बढेसंगै तटिय क्षेत्रका सर्वसाधारण रातभरि जागराम बस्नुपर्ने बाध्यता छ ।

आइतबार साँझ ६ बजेसम्म नदिको पानी घरमा नपसेको जिल्ला प्रहरी कार्यालयका डिएसपी तुल्सीराम अर्यालले बताए । ‘गुलरिया नगरपालिका–१ मा १ घरमा र वडा ६ मा १२ घरमा वर्षातको पानी पसेको छ,’डिएसपी अर्यालले भने,‘त्यसैगरि मधुवन–३ मा ४ घरमा वर्षातको पानी पसेको छ ।’ गुलरिया नगरपालिका–११ स्थित बाँध भत्केको ठाउँको आफै अनुगमन गरेर आएको डिएसपी अर्यालले सुनाए । बाँध फुटेर नदिको पानी खेतमा भरिएको छ । घरमा नदिको पानी पसेको जानकारी नआएको डिएसपी अर्यालले जानकारी दिए ।

बबई नदीको चेपाङ स्थित बाढी मापन केन्द्रले साँझ ६ बजे ५ दशमलव ३५ मिटरमा देखाएको थियो । उक्त केन्द्रमा पानीको सतह ५ दशमलव ५० मिटर पुग्यो भने चेतावनी तह र ६ दशमलव ८० मिटर पुग्यो भने खतरा तल निर्धारण गर्छ ।

पानीको बहाब बढेसंगै नदी तटिय क्षेत्रमा बसोबास गर्ने बासिन्दालाई उच्च सतर्कता अपनाउन जिल्ला विपद् व्यवस्थापन समितिले आग्रह गरेको छ । बाढीको समयमा नदी किनारमा काठदाउरा छोप्न, माछा मार्न नजान, डुबान हुने क्षेत्रका बासिन्दाहरु सुरक्षित रहन्, घरमा भएका महत्वपुर्ण बस्तु नगद र गरगहना जिन्सी सामान सुरक्षित ठाउँमा राख्न जिल्ला विपद् व्यवस्थापन समितिले आग्रह गरेको छ ।

प्रतिक्रिया

सम्बन्धित खवर