बर्दिया,असार २५ (फरकसमाचार)/ लागु औषधसहित प्रहरीले दुई जनालाई पक्राउ गरेको छ । बढैयाताल गाउँपालिका–२ फुटाहा स्थितबाट प्रहरीले लागु औषध ब्राउन सुगरसहित दुई जनालाई आइतबार पक्राउ गरेको हो । पक्राउ पर्नेमा बाँके खजुरा गाउँपालिका–६ का २३ वर्षिय पदम बहादुर बुढा मगर र २५ वर्षिय शंकर विक रहेका छन् ।

दुवै जना शंकास्पद रुपमा भारत तर्फबाट नेपाल तर्फ आइरहेका थिए । प्रहरीले नियन्त्रणमा लिई चेकजाँच गर्दा सेतो प्लाष्टिकको पुरियामा लुकाई छिपाई राखेको अवस्थामा मगरको साथबाट लागु औषध ब्राउन सुगर फेला परेको जनाईएको छ ।

प्रहरीका अनुसार २ सय ८० मिलीग्राम लागु औषध ब्राउन सुगर बरामद भएको छ । दुवै जनालाई नियन्त्रणमा लिई इलाका प्रहरी कार्यालय मैनापोखरमा राखी थप अनुसन्धान भईरहेको लुम्बिनी प्रदेश प्रहरी कार्यालय दाङले जनाएको छ ।