बर्दिया,साउन १(फरकसमाचार)/ जंगली हात्तीको आक्रमणबाट एक जनाको मृत्यु भएको छ । ठाकुरबाबा नगरपालिका–२ परैनीका ५० वर्षिय शिव प्रसाद थारुको सोमबार हात्तीको आक्रमणबाट मृत्यु भएको हो ।

ठाकुरबाबा नगरपालिका–२ स्थित बर्दिया राष्ट्रिय निकुञ्जभित्र १५/१६ जना मानिसहरु च्याउ टिप्न गएको बेला जंगली हात्तीले आक्रमण गरेको जनाईएको छ । हात्तीको आक्रमणबाट घटनास्थलमै थारुको मृत्यु भएको प्रहरीले जनाएको छ ।

त्यसैगरि गेरुवा गाउँपालिका–१ भटेरा घर भई ठाकुरबाबा नगरपालिका–२ बलाती माईतीघर आएकी ३५ वर्षिय बिश्रम थरुनीको हात्तीको आक्रमणबाट बाँया हात र दाया खुट्टामा चोट लागी नगर अस्पताल भुरिगाउँमा उपचार भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।