बर्दिया,साउन ८(फरकसमाचार)/ आवश्यक प्रक्रिया नपुगाई संचालन गरिएका राँगाको मासु बिक्री गर्ने पसललाई प्रशासनले कारवाही गरेको छ । गुलरिया नगरपालिका–६ पुरानो गाविस टोल स्थित रहेका राँगाको मासु बिक्री गर्ने पसललाई प्रशासनले सोमबार कारवाही गरेको हो । सहायक प्रमुख जिल्ला अधिकारी रोशन कुमार कठायतको नेतृत्वमा गएको बजार अनुगमन टोलीले कारवाही गरेको छ ।

गुलरिया नगरपालिका–६ पुरानो गाविस टोल स्थित दर्ता प्रक्रिया पुरा नगरि संचालन गरिएको बराती र कुरेसी राँगा मासु बिक्री पसललाई सिल गरिएको सहायक प्रजिअ कठायतले बताए । दर्ता प्रक्रिया पुरा नभएसम्म उक्त दुई राँगा मासु पसल बन्द रहनेछ । त्यसैगरि अफताब पशु चौपाया सप्लायर्सलाई रु २० हजार जरिबाना गरिएको सहायक प्रजिअ कठायतले जानकारी दिए । मुवारक फ्रेस हाउसलाई १० हजार र बबई खसी बोका मासु सेन्टरलाई रु ५ हजार जरिवाना गरिएको छ ।

अनुगमनमा सहायक प्रमुख जिल्ला अधिकारी रोशन कुमार कठायत, प्रमुख प्रशासकीय अधिकृत राजेश यादव, पशु क्वारेन्टाईन चेक पोष्टका प्रमुख नारायण प्रसाद पोखरेल, डिएसपी तुल्सीराम अर्याल, गुलरिया नगरपालिका–६ का वडा अध्यक्ष सुधान्सु प्रकाश शर्मा, पशु सेवा अधिकृत डा.रुपेन्द्र कुमार वली, उद्योग वाणिज्य संघका प्रतिनिधि लगायतको सहभागिता रहेको थियो ।