बर्दिया,साउन ८(फरकसमाचार)/ पछिल्लो समय गुलरियामा चोरीका घटना बढेका छन् । गुलरिया बजारमा दिनदहाडै पसलमा चोरी हुन थालेपछि व्यापारी त्रसित बनेका थिए । लुटेराहरुबाट कसरी घर जोगाउने सर्वसाधारणलाई ठुलो चिन्ता थियो । सर्वसाधारणको जिउधन सुरक्षाको लागि प्रहरीले नयाँ ट्रिक अपनाएको छ ।

यस ट्रिकले चोरीलगायतका अपराध नियन्त्रण हुने प्रहरीको दावी छ । विशेष काम बाहेक राम्रा नियतका व्यक्ति राती अबेरसम्म घरमा सुत्न छोडेर लखर लखर नडुल्ने प्रहरीको ठम्याई छ । बिना कामको राती अबेरसम्म डुल्नेलाई प्रहरीले नियन्त्रणमा लिई कारवाही सुरु गरेको छ । प्रहरीले अपनाएको ट्रिकको यतिबेला चर्चा भईरहेको छ ।

राती ११ बजेपछि हिडडुल गर्ने व्यक्तिहरुलाई नियन्त्रणमा लिएको प्रहरीले दावी गरेपनि त्यस अघि नै नियन्त्रणमा लिईरहेको स्थानीयको भनाई छ । दश बजेपछि नै प्रहरीले पसल बन्द गराउने, हिडडुल गर्दा प्रहरी भ्यान बोलाएर भित्र पठाउँदा बिजनेस व्यवसाय चौपट भएको स्थानीय व्यवसायीहरुको गुनासो छ ।

चोरीका घटना बढेकोले चोरीलाई फोकस गरेर राती अबेरसम्म बिना काम डुल्नेलाई नियन्त्रणमा लिईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले बताए । ‘बिना काम राती अबेरसम्म डुल्ने प्राय मापसे र लागु औषध सेवन गर्ने हुन्छन्,’डिएसपी अर्यालले भने,‘जसले गर्दा दुर्घटना हुने सम्भावना बढी हुन्छ ।’

असार देखि राती ११ बजेपछि बिना काम हिडडुल गर्नेलाई नियन्त्रणमा लिईरहेका छौं । हालसम्म ५१ जनालाई नियन्त्रणमा लिई आवश्यक छानबिन गरिसकेको डिएसपी अर्यालले जनाए । ‘चोरी डकैती र दुर्घटना न्युनिकरण गर्ने उदेश्यले बिना काम राती हिड्नेलाई नियन्त्रणमा लिएका छौं,’डिएसपी अर्यालले भने,‘जेनुन काममा हिडेकालाई छोडेका छौं ।’ नियन्त्रणमा लिईएका व्यक्तिहरुको हिस्टरी हेर्ने, सोधपुछ र अनुसन्धान गरि भोलिपल्ट छोड्ने गरेको डिएसपी अर्यालले जनाए ।