मङ्गलबार, असार २४, २०८२
मा प्रकाशित
1060
Shares
अभिनव कुमार पाठक
बर्दिया,असार २४/ जिल्ला स्थित रहेका आठ वटै स्थानीय तहका प्राविधिकहरूसँग अन्तरक्रिया कार्यक्रम गरिएको छ । एकीकृत कृषि तथा पशुपन्छी विकास कार्यालयको आयोजनामा सोमबार प्राविधिकहरुसंग अन्तरक्रिया गरिएको हो । अन्तरक्रिया कार्यक्रममा भेटनरी सम्बन्धि प्राविधिकहरुसंग व्यापक छलफल गरिएको छ ।
जिल्ला स्थित रहेका सबै पालिकाका कृषि र पशुपन्छी शाखाका प्रतिनिधिले आर्थिक वर्ष ०८१÷०८२ मा गरेको कार्यक्रमहरूको प्रस्तुतिकरण गरेका थिए ।
वार्षिक प्रगतिमा कृषिबाट अनुदानमा प्राप्त बिउ वितरण, मोटर वितरण, पावर ट्रेलर वितरण, मल वितरण तथा भेटनरीबाट भ्याक्सिन, स्टोर, पशु स्वास्थ्य, ल्याब व्यवस्थापन जस्ता कार्यक्रमहरू सम्पन्न भएको जनाईएको छ ।
आयोजित कार्यक्रमहरू मध्ये राम्रो लाग्ने प्रगतिहरू फर्ममा भरेर छिटो भन्दा छिटो पठाइदिन एकीकृत कृषि तथा पशुपंक्षी विकास कार्यालयका प्रमुख सागर ढकालले आग्रह गरे । ‘बर्दिया बाहेक सबै जिल्लाको तथ्याङ्क माथि पुगिसकेको छ,’प्रमुख ढकालले भने,‘आगामी आर्थिक वर्षको बजेट नआएको कारण कुनै पनि कार्यक्रम छैन ।’
कार्यक्रममा उपस्थित शाखाका कर्मचारीहरूले स्थानीय तहका प्रमुखहरूलाई सुझाव तथा सल्लाहहरू पनि दिएका छन् । उक्त कार्यक्रममा एकीकृत कृषि तथा पशुपंक्षी विकास कार्यालयका प्रमुख सागर ढकाल, पशु विकास अधिकृत रूपेन्द्र कुमार ओली, बागवानी प्राविधिक अधिकृत तीर्थ बहादुर खड्का, पशु चिकित्सक अनिल कुमार शर्मा, मत्स्य प्राविधिक विनोद मल्ल, स्थानीय तहका प्राविधिक कृषि र भेटनरी शाखाका प्रतिनिधिहरुको उपस्थिति रहेको थियो ।
