अभिनव कुमार पाठक

बर्दिया, असार २५ (फरकसमाचार) / रसुवामा मंगलबार बिहान साढे ३ बजे आएको बाढीमा बर्दियामा पाँच जना बेपत्ता भएका छन् । बारबर्दिया नगरपालिकाका चार र बढैयाताल गाउँपालिकाका एक जना बाढीमा बेपत्ता भएका हुन् । बर्दियाका बेपत्ता भएका पाँच जना मजदुरी गर्ने सिलसिलमा रसुवा गएको खुलेको छ । रसुवा प्रहरीका अनुसार उनीहरुको अवस्था अज्ञात रहेको छ ।

बर्दियाका बेपत्ता पाँच जनाको ठेगाना एकिन भएको जिल्ला प्रहरी कार्यालय गुलरियाका प्रहरी निरीक्षक कृष्ण डाँगीले बताए । प्रहरी निरीक्षक डाँगीका अनुसार रसुवामा बेपत्ता हुनेमा बारबर्दिया नगरपालिका–९ खैरेनीका ३० वर्षिय सुरेश थारु, वडा नं. १० का ३६ वर्षिय जिपन चौधरी, ३२ वर्षिय सन्तोष दहित, २५ वर्षिय बुद्धिराम थारु र बढैयाताल गाउँपालिका–६ का २९ वर्षिय लक्ष्मी नारायण थारु छन् ।

त्यसैगरि उद्दार कार्यमा खटिएका तीन प्रहरी पनि सम्पर्कबिहीन भएका छन् । सशस्त्र प्रहरी बलका अनुसार बेपत्ता हुनेमा नेपाल प्रहरी अन्तर्गत इलाका प्रहरी कार्यालय, टिमुरेमा कार्यरत प्रहरी सहायक निरीक्षक लालबहादुर श्रेष्ठ, प्रहरी जवान मुन्ना ठाकुर र लोकेन्द्र बोहोरा छन् ।

उत्तरी छिमेकी राष्ट्र चीनतर्फ अबिरल वर्षाका कारण भोटेकोशी नदीमा आएको बाढीले रसुवाको टिमुरे क्षेत्रमा ठुलो क्षति भएको छ । रसुवा गोसाइकुण्ड गाउँपालिका–२ स्थित रसुवागढीमा चीनतर्फ परेको अबिरल वर्षाका कारण आएको भीषण बाढीले बर्दियाका पाँचसहित २० जना सम्पर्कविहीन रहेको जिल्ला प्रहरी कार्यालय रसुवाले जनाएको छ । त्यसैगरि बाढीमा फसेका ५५ जनाको उद्धार गरिएको र १ सय बढी गाडी बगेको प्रहरीले जनाएको छ ।