बर्दिया,असार २६ / पछिल्लो समयमा गुलरियामा चितुवाको आतंक बढ्दो छ । गुलरिया नगरपालिका वरिपरि क्षेत्रमा विगत केही महिना देखि चितुवाले निरन्तर आक्रमण गरिरहेको छ । चितुवाको निशानामा प्राय बालबालिका र पशुचौपाया परेको देखिन्छ । चितुवा निरन्तर बस्तीमा पसेर पशुचौपायालाई शिकार बनाउँदा स्थानीय त्रसित बनेका छन् ।

रातिको समयमा शौचालयसमेत जान सर्वसाधारण डराउन बाध्य छन् । सिमावर्ती भारतीय मुर्तिहा जंगलबाट निस्कने चितुवाले विगत केही दिन देखि गुलरिया नगरपालिका–८ सुरजपुर स्थित निरन्तर पशुचौपायाको शिकार गरिरहेको छ । उक्त चितुवाले बुधबार मध्यरातमा गुलरिया नपा–८ सुरजपुरका अवधराम लोधको खोरमा बाँधिएका बाख्रालाई शिकार बनाएको छ । दुई ठुला बाख्रा चितुवाले मारेर खाएको छ भने एउटा बाख्राको घा“टीमा गम्भिर घाउँ बनाएर छोडेको छ । त्यो बाख्रा पनि बाँँच्ने सम्भावना कमै छ ।

चितुवाले अति विपन्न परिवारको खोर नै खाली गराएको छ । समुहबाट रु ४० हजार ऋण लिएर बाख्रा पालेको अवधराम लोधले बताए । ‘पालेको बाख्रा चितुवाले खायो,’उनले भने,‘अब समुहबाट निकालेको ऋण तिर्ने मसंग कुनै जुुगाड छैन ।’ यस्तै सोही ठाउँका हिम बहादुर पुनको अघिल्लो साता दुई वटा ठुला खसी चितुवाले मारेको थियो । भारतीय जंगलबाट निस्कने चितुवा दिनहुँ गाउँबस्तीमा पस्ने गरेको स्थानीयले बताउँछन् ।
एक महिना देखि निरन्तर कुकुर खाईरहेको चितुवा बाख्रा खान सुरु गरेको गुलरिया नगरपालिका–८ का वडा सस्दय मनोज विक्रम न्यौपानेले बताए । ‘बस्तीमा पल्केको चितुवाले कुनै दिन मानविय क्षति गर्न सक्ने जोखिम बढेको छ,’उनले भने,‘चितुवाको आतंक समयमा रोक्न सम्बन्धित निकायले पहल गर्न जरुरी छ ।’

सिमावर्ती भारतीय मुर्तिहा जंगलबाट निस्कने चितुवाले गुलरिया नगरपालिका–८ सुरजपुर, सर्जुनदी टपरा, वडा नं. ७ स्थित चौगुर्जी, वडा नं. १ स्थित छेदापुरमा निरन्तर पशुचौपायालाई शिकार बनाउँदै आएको छ । डिभिजन वन कार्यालयको तथ्यांक अनुसार चालु वर्षमा चितुवाको आक्रमणबाट १ महिला, २ बालिका र १ बालक गरि ४ जनाको मृत्यु भइसकेको भने १३ जना घाईते भएको देखिन्छ । जसमा गुलरिया स्थित २ जना बालिकाको चितुवाको आक्रमणबाट ज्यान गएको छ ।

गत असार १ गते र जेठ २१ गते गुलरिया नगरपालिका–५ बालापुर स्थित थारु सामुदायिक वनबाट वनले दुई वटा समस्याग्रस्त चितुवालाई नियन्त्रणमा लिई सुरक्षित स्थानमा छोडेको थियो । तर,पनि गुलरिया आसपासमा चितुवाको आक्रमण रोकिएको छैन । गत १४ गते गुलरिया नगरपालिका–६ स्थित सर्जु सामुदायिक वनमा घाँस काट्न गएको बेला गुलरिया नगरपालिका–७ का ३२ वर्षीय बिरेन्द्र यादवलाई चितुवाले आक्रमण गरि घाईते बनाएको थियो ।

पछिल्लो समयमा गुलरिया नगरपालिका–५,६ स्थित तार जाली नहुँदा चितुवाले बढि आक्रमण गरेको गुलरिया नगरपालिका– ६ का रमेश चौधरीले बताए । चितुवा बस्ती पस्न नदिन सम्बन्धित निकायले सामुदायिक वनमा तारजाली लगाउनुपर्ने उनले माग गरे । त्यसैगरि हामी सार्वसाधारणले आ–आफ्नो सुरक्षा आफै गर्न घर वरिपरि झाडी सफाई गर्ने, बालबालिकालाई विशेष साँझ बिहान ध्यान दिने र एक्लै वनमा नजान उनले आग्रहसमते गरेका छन् ।

चालु आर्थिक वर्षमा ८३ घरधुरीका १ सय २० वटा पशुचौपाया चितुवाले मारेको डिभिजन वन कार्यालयका सुचना अधिकारी रामकुमार चौधरीले बताए ।