बर्दिया,असार २९ (फरकसमाचार) / जिल्ला स्थित ६५ प्रतिशत धान रोपाई सकिएको छ । असार सकिन लाग्दासमेत ६५ प्रतिशत मात्र रोपाई सकिएको हो । सिंचाई सुविधा नपुगेको क्षेत्रमा ढिलो रोपाई भएको छ भने सिंचाई सुविधा पुगेको पालिकामा धेरै रोपाई भईसकेको छ ।

आकासे पानीको भरमा रोपाई ढिलो भएपछि किसानले मोटर बोरिङले सिंचाई गरि धान रोपाई गर्न बाध्य छन् । त्यसैगरि मल अभावले पनि रोपाईमा समस्या भएको किसानले गुनासो गर्छन् ।

मल अभाव कुनै नयाँ समस्या नरहेको गुलरिया नगरपालिका–७ का रमेश लोधले बताए । ‘खेती लगाउने सिजनमा मल अभाव सधैंको समस्या हो,’उनले भने,‘यो समस्या समाधान गर्न सम्बन्धित निकायले चासो देखाएको पाईदैन ।’

शनिबारसम्म ६५ प्रतिशत धान रोपाई भईसकेको एकीकृत कृषि तथा पशुपंक्षी विकास कार्यालयका प्रमुख सागर ढकालले बताए । ‘विगतका वर्षमा पनि असारसम्म रोपाई सकेको अनुभव छ, पानी नपरेर अलि ढिलाई भईरहेको छ,’उनले भने,‘अब करिब एक हप्ताभित्र रोपाई सकिनेछ ।’उनलका अनुसार जिल्ला स्थित ५० हजार १ सय ५० हेक्टरमा बर्खे धान खेती हुन्छ ।