बर्दिया,असार २९ (फरकसमाचार) / मोटरसाइकल दुर्घटनामा एक जनाको मृत्यु भएको छ । गुलरिया नगरपालिका–५ जिल्ला समन्वय समिति कार्यालय नजिक मोटरसाइकल दुर्घटना हुँदा जिल्ला बहाराईच ग्राम मिहिपुरवाका ६५ वर्षिय गुरमुख सिंहको आइतबार सवा ३ बजे मृत्यु भएको हो ।

सिंहले युपि ४० बिबि १६२९ नंम्बरको मोटरसाइकल चलाई सुहेलवा देखि राधाकृष्ण चोकतर्फ जाँदै गरेको अवस्थामा दिउँसो साढे २ बजे दुर्घटना भएको प्रहरीले जनाएको छ । प्रहरीका अनुसार मोटरसाइकल अनियन्त्रित भई सडक छेउमा रहेको विद्युत पोलमा ठोक्किदाँ सिंहको टाउकोमा गम्भिर चोट लागेको थियो ।

घाईते सिंहलाई उपचारको लागि प्रहरीले तत्काल बर्दिया अस्पताल पु¥याएको थियो । उपचारको क्रममा आइतबार दिउँसो ३ बजेर १० मिनेटको समयमा चिकित्सकले घाईते सिंहलाई मृत घोषणा गरेको जिल्ला प्रहरी कार्यालय गुलरियाका डीएसपी चक्र बहादुर डमरपालले जानकारी दिए । प्रहरीका अनुसार मृतक सिंह गुलरिया नगरपालिका–८ कोठिया स्थित पन्जाब डिजल वर्कसबमा ट्याक्टर बनाउने मिस्त्रीको काम गर्ने गरेको खुलेको छ ।