बर्दिया,असार ३१ / नेपाली पत्रकारिता क्षेत्रले एक अनुभवी, निष्ठावान् र अग्रणी व्यक्तित्व गुमाएको छ । नेपाल पत्रकार महासंघका पूर्व केन्द्रीय उपाध्यक्ष कृष्ण प्रसाद बस्याल(राकेश)को ५३ बर्षको उमेरमा सवारी दुर्घटनामा असमायिक निधन भएको छ । सोमबार गुलरिया स्थित भादा घाटमा पत्रकार बस्यालको अन्त्येष्टि गरिएको छ । मोटरसाईकल दुर्घटनामा घाईते भएका बस्यालको थप उपचारको लागि कोहलपुर स्थित शिक्षण अस्पतालमा लगिएको थियो ।

घाईते पत्रकार बस्यालको रगत नरोकिदा समस्या उत्पन्न भई निधन भएको हुन सक्ने चिकित्सकको अनुमान छ । पत्रकारितामा चार दशक भन्दा बढी समय सक्रिय रहेका बस्यालले राष्ट्रिय र स्थानीय तहमा पत्रकारिता विकासमा महत्वपूर्ण योगदान पुर्याएका थिए । नेपाल पत्रकार महासंघको ५९ सालमा जिल्ला अध्यक्षको नेतृत्व लिदै २०६२ सालमा केन्द्रिय उपाध्यक्ष पदमा निर्वाचित भएर पुग्दा जिल्ला विकास र समृद्धिलाई सँगै लिएर हिड्नु पर्ने मिसन पत्रकारितामा उनको संलग्नता देखिन्छ । बिभिन्न संघ संस्थामा आबद्ध उनी वातावरण पत्रकारीतामा राम्रो दख्खल भएको सहकर्मी स्मरण गर्छन् ।

सम्पादकीय नेतृत्व गरेको उनीसँग अनुभव थियो । साथै, प्रेस स्वतन्त्रता, श्रम अधिकार र मिडिया सुधारका अभियानहरूमा उनको अग्रसरता स्मरणीय रहनेछ ।

नेपाल पत्रकार महासंघ, विभिन्न सञ्चार संस्था, राजनीतिक दल, सामाजिक संघसंस्थाले उनीप्रति श्रद्धाञ्जली अर्पण गर्दै गहिरो समवेदना व्यक्त गरेका छन् । नेपाली काँग्रेसका तर्फबाट सुभाष पोखरेलले श्रद्धाञ्जलि सभालाई सम्बोधन गरेका थिए भने नेपाली काँग्रेसका जिल्ला सभापति अरुण राठोरले पार्थिव शरिरमा झन्डा ओढाएका थिए । पार्थिव शरीर नजिक रहेर अन्तिम श्रद्धाञ्जली सभामा सयौ शुभचिन्तक सहभागि थिए ।
‘एक सत्य निष्ठावान् र संघर्षशील पत्रकार गुमाएका छौं ।

पत्रकारका गुरु बस्यालको योगदानको सधैँ स्मरणीय रहनेछ,’ पत्रकार महासंघका अध्यक्ष निर्मल घिमिरेले भने । बस्यालको एक छोरा,एक छोरी र पत्नि छन् । उनको छोरा हरित बस्यालले पार्थिव शरीरमा दागबत्ति दिएका थिए ।