दैलेख, चैत ९ : उमेरले ६६ पुगेका भैरवी गाउँपालिका–१ का कर्णबहादुर कार्कीलाई बुढेसकालमा समेत पानी बोक्नुपर्ने समस्या कायमै थियो । यो उनको रहर नभएर बाध्यता थियो । दम रोगले समस्यामा परेका कार्की आफूले छ महिनादेखि नधोएको कोट धुनका लागि पनि ३५ लिटरको जर्किनमा पानी बोकेर घरमा ल्याएका थिए।

 घरभित्रकाे भान्सा र पानी व्यवस्थापनको काम विशेष गरेर महिलालाई हुने गर्दछ ।  वडा नं १ डावका महिला, पुरुष र विद्यालय जाने बालबालिकालाई पानीको जोहो गर्नेबारेमा सधैँ पिरलो हुने गर्दथ्यो । बस्तीभन्दा करिब एक घण्टा तल रहेको पानीको मुहान बाट पानी ल्याउन राति नै उठेर लाइन बस्नुपर्ने अवस्था थियो । पानी भरेपछि निकै उकालो डाँडाबाट बोकेर पानी लिनुपर्ने बाध्यता अहिले हटेको छ । गाउँका ४५ घरका बासिन्दाको दैनिकी अहिले फेरिएको छ । आँगनमै पानी आउला भनेर कल्पना नगरेका स्थानीय शुद्ध पानी गाउँमा आए पनि दंग छन् ।

 ग्रामीण जलस्रोत व्यवस्थापन परियोजना र गाउँपालिकाको सहयोगमा सोलार लिफ्टमार्फत डाँडामा खानेपानी पुगेको हो । स्थानीयको घरमै पानी आएपछि महिला र पुरुषका दुःखका दिन सकिएको वडा नं १ का वडाध्यक्ष काशीराम कार्कीले बताए  । ‘पानी आउला भनेर जनताले सोचेका थिएनन्, अब वडा कार्यालय, शिक्षा र स्वास्थ्यमा समेत खाने पानी पुगेको छ’, कार्कीले भने ।

 करिब चार महिनाअघि गाउँपालिका र ग्रामीण जलस्रोत व्यवस्थापन परियोजनाको सहयोगमा ५० लाख लागतमा सोलार लिफ्टमार्फत पानी ल्याउने योजना बन्यो काम शुरु भयो, स्थानीय उपभोक्ता र कामको जिम्मेवारी लिएका निकायको प्रयासपछि अहिले सुख्खा डाँडामा पानी आउन शुरु गरेको छ । अहिले ३४५ मिटर अग्लो स्थानमा सोलारमार्फत पानी पुगेको छ । रातभर आठ हजार लिटर पानी मुहानकै ट्यांकीमा जम्मा हुन्छ र दिनभर आठ हजार लिटर पानी सोलारमार्फत गाउँमा पुगेको प्राविधिक सहजकर्ता जंग रावलले जानकारी दिएका छन् ।

 आधुनिक प्रविधिको प्रयोगले जनतालाई राहत भएको भैरवी गाउँपालिकाका अध्यक्ष प्रेम बुढाले बताए  । वडामा विद्युत् नपुगे पनि सौर्य ऊर्जा जडान गरी योजना सञ्चालन गरिएको छ । विद्यार्थीले भनेको समयमा विद्यालय जान पाएका छन् । महिलाको कार्य बोझ घटेको गाउँपालिकाका उपाध्यक्ष पदमकुमारी विष्टले जानकारी दिए ।