बर्दिया, चैत १४

सशस्त्र प्रहरीले लागु औषधसहित युवकलाई पक्राउ गरेको छ । शुक्रबार सशस्त्र प्रहरी बल नेपाल नम्बर ३१ गण हेड क्वाटरको मातहत युनिट फुटाहाबाट सशस्त्र प्रहरी निरीक्षक भुवनेश्वर कुमार न्यौपानेको कमाण्डमा खटिएको टोलीले लागु औषध सहित युवकलाई पक्राउ गरेको हो । सशस्त्र प्रहरीले युवकलाई बढैयाताल गाउँपालिका–२ फुटाहाबाट पक्राउ गरेको हो । पक्राउ पर्नेमा बढैयाताल गाउँपालिका–६ मैनापोखर बस्ने २२ वर्षिय राजेश कुमार थारु रहेका छन् । सशस्त्र प्रहरीले थारुबाट लागु औषध नाईट्रोभेट ट्याब्लेट एक सय वटा बरामद गरेको छ । थारुलाई नियन्त्रणमा लिई कारवाहीको लागि प्रहरी चौकी जमुनीमा बुझाएको सशस्त्र प्रहरी उपरीक्षक नर बहादुर रावतले बताए ।