राम प्रसाद चौहान

बर्दिया, चैत २०

१२औं राष्ट्रिय जनगणना २०७८ को सम्पूर्ण तयारी अन्तिम चरणमा पुगेको छ । जिल्लामा घर दैलो अभियान मार्फत गरिने जनगणनाबाट वास्तविक गणना हुने बिश्वास लिएको छ । १२औं राष्ट्रिय जनगणनाको तयारी तिब्र पारिएको जिल्ला जनगणना कार्यालय बर्दियाले जनाएको छ ।
राष्ट्रिय जनगणना जिल्ला स्तरीय सचेतना गोष्ठी कार्यक्रममा बिहीबार सम्पन्न भएको छ । नेपालमा विस १९६८ साल देखि जनगणना सुरु भएको हो । नेपालमा राष्ट्रिय जनगणना दश बर्ष अन्तरालमा हुने गरेको छ । पहिलो चरणमा सुपरिवेक्षकहरुले बैशाख २६ गते देखि जेठ १४ गतेसम्म स्थलगत घरधुरी संख्याको सुचिकरण गर्ने छन् । राष्ट्रिय जनगणना आउने जेठ २५ गते देखि असार ८ गतेसम्म संचालन हुनेछ ।
‘मेरो गणना मेरो सहभागिता’भन्ने मुल नाराका साथ राष्ट्रिय जनगणना संचालन हुनेछ । हालसम्म ११ पटक जनगणना भईसकेको छ । राष्ट्रिय जनगणना जिल्ला स्तरीय सचेतना गोष्ठी कार्यक्रममा प्रमुख जिल्ला अधिकारी सन्त बहादुर सुनारले व्यापाक रुपमा प्रचार प्रसार गरेर सही डाटा दिएर १२औं राष्ट्रिय जनगणना सफल बनाउन आग्रह गरेका थिए ।

गणनामा खटिएका गणकहरुलाई जस्तो किसिमले जानकारी दियौं त्यहीअनुसार संकलन विवरणको नतिजा देखिन्छ । त्यसैले घर दैलोमा खटिने गणकहरुलाई सही जानकारी दिन अनुरोध गरेको थिए । जिल्लामा ५ सय गणक र १ सय १६ जना सुपरिबेक्षक खटिने जिल्ला जनगणना कार्यालयले जनाएको छ । प्रत्येक गणकको भागमा २ सय देखि २ सय ५० घर धुरी संख्या विवरण संकलन गर्नुपर्ने छ । चार वटा स्थानीय तहमा जनगणना कार्यालय स्थापना गरी काम गर्ने जिल्ला जनगणना कार्यालयले जानकारी दिएको छ । गुलरिया नगरपालिका, बाँसगढी नगरपालिका, मधुवन नगरपालिका र राजापुर नगरपालिकामा कार्यालय स्थापना गरी काम गर्ने योजना छ ।

कार्यक्रममा जनगणना सम्बन्धि जिल्ला जनगणना कार्यालय बर्दियाका प्रमुख दान बहादुर आईडीले प्रकाश पारेका थिए । त्यसैगरी कार्यक्रममा प्रमुख जिल्ला अधिकारी सन्त बहादुर सुनार, प्रहरी उपरीक्षक ईश्वर कार्की, सशस्त्र प्रहरी उपरीक्षक नर बहादुर रावत, गुलरिया नगरपालिकाका प्रमुख प्रशासकिय अधिकृत प्रकाश देवकोटा र विभिन्न कार्यालयका प्रमुखहरुको उपस्थिती रहेको थियो । गणकको व्यबहार र शैली जस्ता कुरा गणनामा प्रभाव पार्ने भएकाले गणना गर्न जाने गणकले कार्यालयले दिएको स्पष्ट निर्देशन अनुरुप काम गर्ने ईमान्दार गणकले संकलन गरेको सूचना भरपर्दो र विश्वसनिय हुने सशस्त्र प्रहरीका उपरीक्षक रावतले कार्यक्रममा धारणा राखेका थिए ।