बर्दिया, २१ (फरकसमाचार)
१२औं राष्ट्रिय जनगणना २०७८ को सम्पूर्ण तयारी बारे राजनीतिक दलहरुसंग शुक्रबार छलफल गरिएको छ । गाउँ सामाजमा राजनीतिक दलका अगुवाहरुको महत्वपूर्ण भुमिका हुने भएकोले छलफल गरिएको जिल्ला जनगणना कार्यालय बर्दियाले जनाएको छ । घर दैलोमा तथ्याङ्क संकलन गर्न आउने गणकहरुलाई सङ्क दिन गाउँ सामाजमा सचेतना फैलाईदिन राजनीतिक अगुवाहरुसंग जिल्ला जनगणना अधिकारी दान बहादुर ऐडीले अनुरोध गरेका छन् । २०७८ सालको राष्ट्रिय जनगणनालाई हामी सबै मिलेर सफल बनाउन समेत आग्रह गरेका थिए । जिल्लामा घर दैलो अभियान मार्फत गरिने जनगणनाबाट वास्तविक गणना हुने बिश्वास लिएको छ । १२औं राष्ट्रिय जनगणनाको तयारी तिब्र पारिएको जिल्ला जनगणना कार्यालय बर्दियाले जनाएको छ ।
नेपालमा विस १९६८ साल देखि जनगणना सुरु भएको हो । नेपालमा राष्ट्रिय जनगणना दश बर्ष अन्तरालमा हुने गरेको छ । पहिलो चरणमा सुपरिवेक्षकहरुले बैशाख २६ गते देखि जेठ १४ गतेसम्म स्थलगत घरधुरी संख्याको सुचिकरण गर्ने छन् । राष्ट्रिय जनगणना आउने जेठ २५ गते देखि असार ८ गतेसम्म संचालन हुनेछ ।
‘मेरो गणना मेरो सहभागिता’भन्ने मुल नाराका साथ राष्ट्रिय जनगणना संचालन हुनेछ । हालसम्म ११ पटक जनगणना भईसकेको छ । अब हुने राष्ट्रिय जनगणनामा घरधुरी संख्याको गणना हुने जनाईएको छ ।
जिल्लामा ५ सय गणक र १ सय १६ जना सुपरिबेक्षक खटिने जिल्ला जनगणना कार्यालयले जनाएको छ । चार वटा स्थानीय तहमा जनगणना कार्यालय स्थापना गरी काम गर्ने जिल्ला जनगणना कार्यालयले जानकारी दिएको छ । गुलरिया नगरपालिका, बाँसगढी नगरपालिका, मधुवन नगरपालिका र राजापुर नगरपालिकामा कार्यालय स्थापना गरी काम गर्ने योजना छ । सो छलफल कार्यक्रममा नेकपा एमालेका प्रतिनिधि अमर बहादुर खड्का, नेपाली काँग्रेस जिल्ला कार्य समितिका सदस्य कैलास प्रसाद अधिकारी, नेकपा माओवादी केन्द्रका प्रतिनिधि छविलाल सिंह र जनता समाजवादी पार्टीका प्रतिनिधि केशव कुमार यादव लगायतको उपस्थिती रहेको जनगणना कार्यालय बर्दियाका सहायक जनगणना अधिकारी हरि भक्त गौतमले जानकारी दिए ।