बर्दिया, चैत २१ (फरकसमाचार)

प्रहरीले चोरी कसुरमा आठ जनालाई पक्राउ गरेको छ । गत १४ गते राती बढैयाताल गाउँपालिका–१ वडा कार्यालयबाट ३ थान कम्प्युटरको सिपियु, तौल नाप्ने मेसिन १ थान, स्वास्थ्य सम्बन्धि एन.सी सेट ३ थान र गुलको मिटर मेसिन १ थान चोरी भएको थियो । चोरी भएको घटनाको प्रहरीले सुक्ष्म अनुसन्धान गरिरहेको थियो ।

अनुसन्धानको क्रममा ईलाका प्रहरी कार्यालय मैनापोखरबाट सादा पोशाकमा प्रहरी निरीक्षक धर्मराज जोशीको कमाण्डमा खटिएको प्रहरी टोलीले गत १७ गते यम बहादुर बिसीको घरबाट सामान बरामद गरेको हो । प्रहरीले सामान बरामद गरेपनि बिसी भने फरार रहेका थिए । सो सामान चोरी कार्यमा संलग्न अन्य पाँच जनालाई प्रहरीले नियन्त्रणमा लिएको थियो । प्रहरीले फरार रहेका व्यक्तिहरुको खोजी गरिरहदा शुक्रबार मुख्य अभियुक्त यम बहादुर बिसी, २२ वर्षिय कमल खड्का र एक नाबालक गरी जम्मा आठ जनालाई पक्राउ गरेको छ । पक्राउ परेका आठै जनालाई प्रहरीले चोरी कसुरमा अनुसन्धान गरिरहेको जिल्ला प्रहरी कार्यालय बर्दियाका सुचना अधिकारी प्रहरी नायब उपरीक्षक हेम बहादुर शाहीले बताए ।