बर्दिया, जेठ ९(फरकसमाचार)/ हावाहुरीको वितण्डा मच्चाउँदा ३० बढी घरमा क्षति पुगेको छ । सोमबार साँझ आएको हावाहुरीले गुलरिया, मधुवन, बाँसगढी नगरपालिका र बढैयाताल गाउँपालिको ३० बढी घरमा क्षति पु¥याएको हो ।

बढैयाताल गाउँपालिका–५ जितेन्द्र थारुको टिनले छाएको ३ कोठे घरको देवाल भत्किदाँ कर्ण बहादुर बिकको टाउकोमा चोट लागेको थियो । हावाहुरी आउँदा विक थारुको घरमा जोगिन पसेका थिए । सामान्य उपचारपछि विक घर फर्केको प्रहरीले जनाएको छ । त्यसैगरि थारुको खरले छाएको गोठ भत्किदाँ २ वटा बाख्रा च्यापिएर मरेको प्रहरीले जनाएको छ । हावाहुरीले अधिकांशको जस्ता पाताले छाएको छाना उडाएको छ ।

बाँसगढी नगरपालिका–४ पहाडीपुर होलीराम थारुको घरको जस्ता पाता उडाउँदा छिमेकी शितल गुरुङको बारीमा बाँधेको भैंसीको पेटमा चोट लागेको छ । मधुवन नगरपालिका–१ कैलाशी लक्ष्मी बिकको घर नजिकको सिमलको रुख ढल्दा ब्लक ईट्टाले बनेको १ तले घर भत्केको छ ।

गुलरिया नगरपालिका–१० जयरामपुरुवा नक्छेद मल्लाहको घर नजिकै रहेको मसलाको रुख ढल्दा कच्ची घर पुर्ण रुपमा क्षती भएको छ । बढैयाताल गाउँपालिका–३ का ३६ वर्षिय सुरेश कामीले चलाएको भे ११ प ३२२८ नंम्बरको मोटरसाइकल भोलागौडि तर्फ जादै गर्दा सोरवा स्कुल नजिक हावाहुरीका कारणले अनियन्त्रित भई बिजुलीको पोलमा ठोकिदाँ मोटरसाइकलको हेड लाईट फुटेको छ ।

हावाहुरीले बढैयाताल र बाँसगढी नगरपालिका क्षेत्रमा अधिकांश विद्युत पोल ढल्दा विद्युत आपुर्ति थप्प भएको थियो । क्षतिको थप विवरण बुझ्ने काम भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।