बर्दिया,जेठ १५(फरकसमाचार)/ नेपाल पत्रकार महासंघ केन्द्रले गैर पत्रकारहरुलाई सदस्यता दिएको निर्णय सच्याउन नेपाल प्रेस युनियनले माग गरेको छ । नेपाल प्रेस युनियन जिल्ला शाखा बर्दियाका अध्यक्ष दीपकलाल श्रेष्ठले हस्ताक्षर गरि सोमबार जारी गरेको विज्ञप्तीमा महासंघको निर्णय सच्याउन माग गरिएको हो ।

नेपाल पत्रकार महासंघ केन्द्रले पत्रकार सुद्धीकरणको नाममा कार्यरत संचारकर्मीहरुको नाम हटाई आफु खुशी गैर पत्रकारहरुलाई सदस्यता बाँडेको आरोप छ । जेठ २६ गते हुने नेपाल पत्रकार महासंघको निर्वाचनलाई लक्षित गरि नियोजित ढंगले सदस्यता प्रदान गरेको विषयमा गम्भिर ध्यानाकर्षण भएको जारी विज्ञप्तीमा उल्लेख छ ।

नेपाल पत्रकार महासंघलाई श्रमजीवि पत्रकारहरुको पक्षमा लाग्न, कार्यरत पत्रकारहरुको सदस्यता कायम गर्न र नेपाल पत्रकार महासंघ बर्दिया शाखाले सिफारिस गरे बमोजिमका पत्रकारहरुको सदस्यता प्रदान गर्न विज्ञप्तीमार्फत माग गरिएको छ । शाखाले सिफारिस नगरेका गैर पत्रकारलाई सदस्यता प्रदान गर्ने निर्णय भत्र्सना गर्दै निर्णय तत्काल सच्याउन माग छ । यदि निर्णय नसच्चाए नेपाल पत्रकार महासंघको गलत कदम विरुद्ध कडा संघर्षमा उत्रिने जारी विज्ञप्तीमा उल्लेख गरिएको छ ।