बर्दिया,जेठ २४(फरकसमाचार)/ लागु औषध ब्राउन सुगरसहित प्रहरीले दुई जनालाई पक्राउ गरेको छ । मधुवन नगरपालिकाका दुई जनालाई लागु औषध ब्राउन सुगरसहित प्रहरीले पक्राउ गरेको हो । पक्राउ पर्नेमा मधुवन नगरपालिका–७ का ३५ वर्षिय दिनेश मगर र २४ वर्षिय अजय सुनार रहेका छन् ।

गुलरिया नगरपालिका–११ गणेशपुर लौकाही सडकखण्ड स्थित भारततर्फबाट नेपालतर्फ शंकास्पद रुपमा आउँदै गरेको अवस्थामा मगरलाई प्रहरीले बुधबार नियन्त्रणमा लिएको हो । नियन्त्रणमा लिई चेकजाँच गर्दा मगरको साथबाट ५ सय ७० मिलीग्राम लागु औषध ब्राउन सुगर फेला परेको प्रहरीले पुष्टि गरेको छ ।

त्यसैगरि गुलरियाको सोही स्थानबाट सुनारलाई प्रहरीले मंगलबार नियन्त्रणमा लिएको थियो । सुनारको साथबाट ३ सय ९० मिलीग्राम लागु औषध बरामद भएको प्रहरीले जनाएको छ । दुवै जनालाई नियन्त्रणमा लिई आवश्यक कारवाहीको लागि थप अनुसन्धान भईरहेको जिल्ला प्रहरी कार्यालय गुलरियाका डिएसपी तुल्सीराम अर्यालले जानकारी दिए ।