बर्दिया,जेठ २५(फरकसमाचार)/ बर्षातको मौसम सुरुवाती चरणमा छ । बर्षातको मौसममा बाढी आउने उच्च जोखिम पनि हुन्छ । बाढीले जिल्लामा प्रत्येक वर्ष धनजनको क्षति पनि व्यहोर्नु परेको छ । बाढीको बेला कसरी धनजनको क्षति न्युनिकरण गर्न सकिन्छ भन्ने उदेश्यले गुलरिया नगरपालिका–८ थपुवा गाउँ नजिक भादा नदीमा बिहीबार बाढी सम्बन्धि कृत्रिम घटना अभ्यास गरिएको छ ।

जिल्ला विपद व्यवस्थापन समितिको आयोजनामा सुरक्षाकर्मीको संयुक्त टोलीले बाढी सम्बन्धि कृत्रिम घटना अभ्यास गरेका छन् । यस अभ्यासले नदी तटिय क्षेत्रमा बसोबास गर्ने नागरिकलाई सुचित गर्दै स्थानीय स्रोत साधनको प्रयोग गरेर बाढीमा फसेका व्यक्तिहरुलाई कसरी उद्दार गर्ने देखाईएको छ । कृत्रिम घटना अभ्यासले विपदको बेला उद्दारमा खटिन सुरक्षाकर्मीलाई थप सहयोग पुग्ने विश्वास छ ।

विपदको पुर्व सन्ध्यामा भादा नदीमा बाढी सम्बन्धि कृत्रिम घटना अभ्यास गरिएको प्रमुख जिल्ला अधिकारी रुद्रादेवी शर्माले बताईन् । ‘बाढीमा पसेकालाई उद्दारपछि सुरक्षित ठाउँमा राख्न ठाउँको पहिचान पनि गर्छौ,’प्रजिअ शर्माले भनिन्,‘सुरक्षित ठाउँमा राख्ने, घाईते बिरामीलाई उपचारको लागि अस्पतालको जनशक्ति तयारी अवस्थामा राख्ने र एकद्वार पद्दतिद्वारा राहत बाड्ने कुरा हुन्छन् ।’

विपदको बेला सुरक्षाकर्मीको मात्र नभई जनप्रतिनिधिलगायत सबैको भुमिका महत्वपुर्ण रहन्छ । विपदको बेला पालिकाले पनि स्वयमसेवकको व्यवस्था गर्नुपर्छ । स्वयमसेवकलाई बाढीको बेला परिचालनको लागि आवश्यक तालिम सुरक्षाकर्मीले दिनेछन् । यस सम्बन्धमा आफुले जिल्ला स्थित रहेका पालिकासंग समन्वय गरि अघि बढ्ने प्रजिअ शर्माले भनाई राखिन् ।

बाढीको बेला सुरक्षितका साथ कसरी बस्ने यस कृत्रिम अभ्यासले नागरिकलाई सचेत बनाएको गुलरिया नगरपालिकाका नगर प्रमुख मुक्तिनाथ यादवले बताए । ‘विस २०७१ सालको बाढीले धेरै धनजनको क्षति गरेको थियो,’नगर प्रमुख यादवले भने,‘आगामी दिनमा बाढी आएमा यस कृत्रिम घटना अभ्यासले क्षति न्युनिकरणमा सघाँउ पु¥याउने छ ।’

जिल्ला विपद व्यवस्थापन समितिको नेतृत्व, गुलरिया नगरपालिकाको सहयोग, नेपाली सेना श्री बज्रदलगणको पहलमा सशस्त्र प्रहरी, नेपाल प्रहरी र रेडक्रसको संयुक्त टिमले बाढी सम्बन्धी कृत्रिम घटना अभ्यास मनसुन–४ मा डेमो प्रदर्शन गरेका छन् ।