बर्दिया,असार १९(फरकसमाचार)/ बर्दिया जिल्ला अदालतले विद्यार्थीहरुसंग न्यायिक बाह्य संवाद कार्यक्रम गरेको छ । सनराइज स्कुलमा अदालतले मंगलबार न्यायिक बाह्य संवाद कार्यक्रम गरेको हो ।

समुदायलाई अदालत र न्यायिक प्रणालीबारे जानकारी गराउने, अदालत प्रतिको आम धारणा बुझ्ने, भ्रम निवारण गर्ने, समुदायको अदालत प्रतिको सरोकार, अदालतबाट समुदायले गरेको अपेक्षाको बारेमा जानकारी गराउने र नागरिकलाई अदालत प्रतिको विश्वासमा अभिवृद्धि गर्ने उद्देश्यले न्यायिक बाह्य संवाद कार्यक्रमको आयोजना गरिएको बर्दिया जिल्ला अदालतका शाखा अधिकृत एवं सुचना अधिकारी अमृता केसीले जनाईन् ।

बर्दिया जिल्ला अदालतका माननीय जिल्ला न्यायाधीश कमल प्रसाद ज्ञवालीको अध्यक्षतामा भएको कार्यक्रममा न्यायिक बाह्य संवाद गर्नुको उद्देश्य, अदालतले गर्ने काम कारबाही, त्यसको कार्यविधि लगायतका बारेमा बर्दिया जिल्ला अदालतका स्रेस्तेदार कपिल पौड्यालले कार्यपत्र प्रस्तुत गरेका थिए । कार्यक्रममा सनराइज स्कुलका कक्षा १०, ११ र १२ मा अध्ययनरत कानूनका विद्यार्थीहरुले अदालतका बारेमा राखेका जिज्ञासालाई माननीय न्यायधीशहरुले सम्बोधन गरेका थिए ।

बर्दिया जिल्ला अदालतको वार्षिक कार्ययोजना अनुरुप आयोजना गरिएको कार्यक्रमका प्रमुख अतिथी बर्दिया जिल्ला अदालतका माननीय जिल्ला न्यायाधीश टेकराज जोशी, बर्दिया जिल्ला बारका अध्यक्ष कमल प्रसाद पाण्डे, वरिष्ठ अधिवक्ता नरेन्द्र कुमार शर्मा, वैतनिक कानून व्यवसायी, सनराइज स्कुलका संचालक तथा प्रशासनिक निर्देशक नन्दराज सुवेदी, एजुकेसनल निर्देशक भोलानाथ क्षेत्री, विद्यालय संचालक भेजेन्द्र बहादुर थापा, नारायण गौतम, प्रधानाध्यापक महेन्द्र प्रसाद पौडेललगायत शिक्षक तथा विद्यार्थीहरुको सहभागिता रहेको थियो ।