बर्दिया,असार २५(फरकसमाचार)/ च्याउ टिप्न गएको बेला नालाले बगाएर बेपत्ता बनाएको महिलाको शव फेला परेको छ । मधुवन नगरपालिका–५ गाउँ नंम्बर १० शक्तिपुरकी अन्दाजी ३५ वर्षिय शान्ता खड्काको सोमबार बिहान ८ बजे शव फेला परेको हो । नेपाल भारत सिमाको ७९ नंम्बर पिलर दशगजा देखि एक सय मिटर भारत तर्फ फकलपुरस्थित जंगलमा खड्का आइतबार च्याउ टिप्न गएकी थिईन् । उक्त स्थानमा रहेको नाला तर्ने क्रममा खड्का बेपत्ता भएकी थिईन् ।

नालाले महिलालाई बेपत्ता बनाएको जानकारी पाउनसाथ सशस्त्र प्रहरी र नेपाल प्रहरीले खोजतलासको लागि भारतीय सुरक्षाकर्मीसंग समन्वय गरेका थिए । खोजतलासका क्रममा भारत फकलपुर बर्दिया भन्ने गाउँ स्थित नहरमा आइतबार बिहान बेपत्ता महिलाको शव फेला परेको हो ।

अविरल वर्षाका कारण जिल्लाभरि ६२ घरमा पानी पसेर २ सय १७ जना प्रभावित भएको जिल्ला प्रहरी कार्यालय गुलरियाको तथ्यांकले देखाएको छ । प्रहरीको तथ्यांक अनुसार गुलरिया नगरपालिका–१० थारु पर्सियाका प्रेमलाल चौधरीको घरमा पानी पसेर पुर्ण रुपमा क्षति भई बाख्राको खोरमा बसेका छन् ।

राजापुर नगरपालिका–१ चनौराका २५ घरमा पानी पसेर राजापुर देखि पाताभार जाने सडकमा पाल टाँगेर बसेका छन् । पानी घटेर अन्य घरपरिवार आ–आफ्नो घरमा फिर्ता भएको प्रहरीको तथ्यांक छ ।