काठमाडौँ,साउन ८ / गृहमन्त्री रमेश लेखकले अध्यागमन देशको मुहार रहेको बताएका छन्। मंगलबार बिहान काठमाडौँस्थित अध्यागमन विभागको निरीक्षण गर्दै गृहमन्त्री लेखकले देशभित्र प्रवेश गर्ने प्रत्येक अन्य देशको नागरिक सबैभन्दा पहिलो नेपालीका रूपमा अध्यागमन कर्मचारीलाई भेट्ने भएकाले अध्यागमन देशको मुहार भएको बताएका हुन्।

‘तपाई (अध्यागमन कर्मचारी) हरूलाई भेट्ने बित्तिकै नेपाल कस्तो छ, नेपाली कस्ता छन् भन्ने कुरा त्यहीँबाट उसले बुझ्छन्,’ गृहमन्त्री लेखकले कर्मचारीलाई निर्देशन दिँदै भने,‘त्यसैले देशको मुहार देखाउने गरी त्यो भाव र भावनाका साथ काम गर्नुस्।’ देशबाट बाहिरिने यात्रुलाई पनि बिदाइ गर्ने अन्तिम नेपाली नागरिक पनि अध्यागमनकै कर्मचारी हुने उनले बताए। उनले भने,‘त्यसैले तपाईँहरू अलि ‘स्मार्ट’ र ‘स्माइलिङ’ पनि हुनुपर्छ।’

यस्तै गृहमन्त्री लेखकले गलत ढंगले मान्छे आउने र जाने कुरामा कर्मचारीको संलग्नता देखिए कारबाही हुने पनि चेतावनी दिए। पछिल्लो समय मानव बेचबिखनका घटना बढिरहेको सुन्नमा आएको बताउँदै  उनले भने, ‘विमानस्थलबाट हुने मानव बेचबिखन पूर्ण रुपमा रोकिनुपर्छ। अवाञ्छनीय गतिविधि स्वीकार्य हुन्न।’

गृहमन्त्री लेखकले अध्यागमन सम्बन्धी विधेयक संशोधनका लागि एक महिनाभित्र मन्त्रालयमा प्रस्ताव पेस गर्न आग्रह समेत गरे। १६ वर्षअघि श्रममन्त्री हुँदा आफूले त्रिभुवन अन्तर्राष्ट्रिय विमानस्थलमा ‘श्रम डेस्क’ राखिएको समेत गृहमन्त्री लेखकले स्मरण गरे। यस्तै दार्चुलाको तिंकर र मुस्ताङको कोरलामा पनि अध्यागमन कार्यालय तत्काल स्थापनाका लागि प्रक्रियाअघि बढाउन विभागलाई निर्देशन दिए।नागरिकन्युजबाट साभार