बर्दिया,मंसिर १८(फरकसमाचार)/ ‘खेलकुदमा सहभागिता, गुलरियाको प्रगति र एकता’मुल नाराका साथ गुलरिया नगरपालिका स्तरीय सत्रौं राष्ट्रिपति रनिङ्ग शिल्ड तथा पाँचौं मेयरकप खेलकुद प्रतियोगिता २०८१ सुरु भएको छ । गुलरिया नगरपालिका–४ कभर्डहलको खेल मैदानमा आज मंगलबार देखि खेलकुद प्रतियोगिता सुरु भएको हो ।

पाँचौं मेयरकप खेलकुद प्रतियोगिताको समुद्घाटन कार्यक्रम आज बिहान साढे १० बजे तय भएको आयोजक समितिका संयोजक माधवराज शर्मा ढकालले बताए । ‘लुम्बिनी प्रदेश सामाजिक विकास मन्त्रालयका मन्त्री जन्मजय तिमिल्सिनाले खेलकुद प्रतियोगिताको उद्घाटन गर्ने कार्यक्रम छ,’संयोजक ढकालले भने,‘कार्यक्रम उद्घाटन पश्चात मार्च पास प्रदर्शन र दौड हुनेछ ।’ भोलि देखि अन्य खेल नियमित अगाडि बढाउने तयारी छ । उक्त प्रतियोगितामा नगरका सामुदायिक र संस्थागत गरि ५४ वटा विद्यालयले सहभागिता जनाएको संयोजक ढकालले जानकारी दिए ।

बुधबार बिहान एथलेटिक्स, दिउँसो भलिबल र कबड्डी खेल हुने संयोजक ढकालले बताए । ‘आधारभूत तहको कलस्टर वाइजको प्रतिस्पर्धा सकिएको छ,’संयोजक ढकालले भने,‘कलस्टर वाइज प्रतिस्पर्धाबाट ८ जना खेलाडी आईसकेका छन् ।’ त्यसैगरि क्रिकेट खेलको फाइनल भईरहेको छ ।

क्रिकेट खेलमा १० वटा विद्यालय सहभागिता जनाएको संयोजक ढकालले जानकारी दिए । प्रतियोगिता शुक्रबार समापन गर्ने तयारी छ । यस प्रतियोगिताको प्रतिस्पर्धाबाट राम्रो खेलाडी उत्पादन हुने आयोजकले विश्वास लएको छ ।