खुशी रामचौधरी

बर्दिया,चैत १०/ मुक्तकमैया समाज, कमैया महिला जागरण समाज र श्रमिक संगठनले संयुक्त रुपमा १२ बुँदे माग सहितको ज्ञापन पत्र बारबर्दिया नगरपालिका र ठाकुरबाबा नगरपालिकामा बुझाएको छ । ठाकुरबाबा नगरपालिका प्रमुख तिलक लम्साल र बारबर्दिया नगर प्रमुखलाई छविलाल थारुलाई मुक्त कमैया पुर्नस्थापना कार्यविधि २०८१ निर्माण गर्न विभिन्न माग सहित ज्ञापन पत्र बुझाईएको हो ।

वि.स.२०५७ साउन २ गते सरकारले कमैया मुक्तिको घोषण गरेतापनिअझै मुक्तकमैया भुमि सम्वन्धि समस्या, श्रम, ज्याला लगाएतका विभिन्न समस्या रहेकाले कार्यविधि निर्माण गरि सबै समस्या सम्बोधन गर्न मुक्तकमैया समाज, कमैया महिला जागरण समाज र श्रमिक संगठनले संयुक्त रुपमा १२ बुदे माग सहितको ज्ञापन पत्र बुझाएको हो ।

मुक्तकमैया समाज र श्रमिक संगठनले मुक्तकमैया परिवारलाई स्वतन्त्रपुर्वक जीवन जिउन सक्ने गरि नगरपालिका स्तरिय पुनः स्थापनाको लागि नीति तथा कार्यक्रममा राखि एकीकृत प्याकेज निर्माण, कामज्याला, समानता, स्वतन्त्रता सहितशिक्षा, स्वास्थ्य रोजगारी, सामाजिक सुरक्षा सहितको दीगो, जीविकोपार्जन सुनिश्चित गर्न संगठनले माग गरेको छ । अनौपाचारिक श्रमशक्ति र श्रम बजार सम्वन्धि अध्ययन, अनुसन्धान, तथ्यांक, अद्यावधिक, विश्लेषण र श्रमशक्ति सम्वन्धिकार्य योजना निर्माण गर्नुपर्ने जनाएको छ ।

सामाजिक सुरक्षा तथा टे«ड युनियन सम्वन्धि पालिका स्तरिय नीति, कानुन, मापदण्ड र नियमन सम्वन्धि कार्यविधि निर्माण, न्युनतम पारिश्रमिक निर्धारण, श्रमिकहरुको सामाजिक सुरक्षाको सन्दर्भमा व्यावसाय जन्य स्वरोजगार सेवा सम्वन्धि आवश्यक कार्य गर्न ज्ञापन पत्रमा उल्लेख गरिएको छ । मुक्तकमैया र युवाहरुलाई सिपविकास तालिम, नेतृत्व विकास तालिमको व्यवस्था गर्नु पर्ने, श्रमिकहरुको विमा, समयमा ज्याला, श्रमिक सहायता कक्षको प्रावधान गरिनु पर्ने माग ज्ञापन पत्रमा उल्लेख गरिएको छ ।

त्यसैगरी अनौपचारिक क्षेत्रका श्रमिकलाई पनि योगदानमा आधारित सामाजिक सुरक्षा कोषमा आवद्धगराई स्थानीय सरकारमा उनीहरुको दर्ता गरी स्थानीय सरकारले अगुवाई गर्नुपर्ने, स्थानिय सरकारले श्रम ऐन, निर्देशिका तथा कार्यविधि बनाई अनुगमन, महिला श्रमिकहरुको लागि स्वरोजगारी र्सिजना, मागमा आधारित आवश्यक सिपको लागि तालिमको व्यवस्थापन तथा श्रमिक मैत्री नीति तथा कार्यक्रम बनाई लगानी गर्नुपर्ने मागसहितको ज्ञापन पत्रबुझाएको मुक्तकमैया समाज लुम्बिनी प्रदेश समिती अध्यक्ष जागेश्वर थारुले बताए ।

ज्ञापन पत्रबुझदै बारबर्दिया नगर प्रमुख छविलाल थारुले मुक्तकमैयाहरु तथा श्रमिकहरुको समस्याहरुलाई सम्बोधन गरि रहेको बताए ।
नगरपालिका तथा हामीले अनुमति दिएर गैरसरकार संस्थाबाट पनि समस्या सम्बोधन गरि रहेका छौं । श्रमिकहरुको अवस्थाबारे अनुगम नगरि रहेको र ज्याला ठगिभएको सम्बन्धमा पनि न्यायिक समिती मार्फत समस्या समाधान गरि रहेको धारणा व्यक्त गरे ।

त्यसैगरी संगठनले संयुक्त रुपमा ठाकुरबाबा नगरपालिकामा पनि ज्ञापन पत्र बुझाएको छ । ज्ञापन पत्रबुझ्दै नगर प्रमुख तिलक लम्सालले मुक्तकमैया र श्रमिकहरुको समस्याबारे जानकार रहेको बताए । श्रमिकहरुलाई ज्याला नदिदाँ सम्म पालिकाबाट निमार्ण कार्य सम्पन्न भएको भुक्तानी रोक्का गर्ने गरेको वा रोजगारदाताले श्रमिकलाई आफ्नो सामुन्ने ज्यालादिन लगाएको सुनाए । उनले मुक्तकमैयाहरुको समस्या समाधानको लागि आफु लागि परेको समेत दावी गरे ।

मुक्तकमैया समाज लुम्बिनी प्रदेश समिती अध्यक्ष जागेश्वर थारुको अगुवाईमा चैत पहिलो साता ज्ञापन पत्र ठाकुरबाबा र बारबर्दिया नगरपालिकामा बुझाईएको कमैया महिला जागरण समाज नेपालका सामाजिक परिचालक प्रेम कुमारी थारुले जानकारी दिईन् । (प्रशिक्षार्थी पत्रकार)