‎अभिनव कुमार पाठक

‎बर्दिया, कार्तिक २५ / ‎नजिकिँदै गरेको प्रतिनिधि सभा निर्वाचनको लागि मतदाना नामावली दर्ता गराउनेको गुलरियामा घुँईचो लाग्ने गरेको छ । आगामी फागुन २१ गते हुने प्रतिनिधि सभाको निर्वाचनका लागि गुलरिया नगरपालिका–६ स्थित रहेको जिल्ला निर्वाचन कार्यालयमा बिहान देखि साँझसम्म मतदाता नामावली दर्ता गराउनेको घुँईचो लाग्ने गरेको हो ।

फागुनमा हुने निर्वाचनका निमित्त मतदान परिचय पत्र बनाउन असोज १० गतेदेखि सर्वसाधारणको उत्साहजनक सहभागिता रहेको जिल्ला निर्वाचन कार्यालयका प्रमुख लालबहादुर मल्लले बताए । ‘आउने सोमबारसम्म मतदाता नामावली दर्ता हुनेछ,’प्रमुख मल्लले भने,‘जिल्लाको ३ लाख २५ हजार जनाको मतदाता नामावली दर्ता थियो, असोज १० गते देखि आइतबारसम्म ९ सय ९२ जानाले मतदाता नामावली दर्ता गराएका छन् ।’

‎पहिलाको निर्वाचनमा मतदाता नामावलीको लागि राजनीतिक दलका नेताहरूले सर्वसाधारणहरुलाई निर्वाचन कार्यालयमा लिएर आउँथे,’मतदाता नामावली दर्ता गराउन आएकी अनिषा योगी थारुले भनिन्,‘अहिले सर्वसाधारण स्वइच्छाले आफुले चाहेको नेतालाई भोट दिई देशमा परिवर्तन ल्याउनको निम्ति मतदाता नामावली परिचय पत्र बनाउन आईरहेका छन् ।’