अभिनव कुमार पाठक

बर्दिया, कार्तिक २६/बालबालिकाको सर्वाङ्गीण विकासको लागि आयुर्वेद स्वास्थ्य केन्द्रले स्वर्णविन्दु प्राशन कार्यक्रम गरेको छ । आयुर्वेद स्वास्थ्य केन्द्रले मंगलबार दोस्रो पटक मंगलबार स्वर्णविन्दु प्राशन कार्यक्रम गरेको हो । आयुर्वेद विज्ञानको बालरोग सम्बन्धि ग्रन्थ काश्यप संहितामा वर्णन गरिएको सुनको कणलाई घिउ र मह लगायत औषधि द्रव्यमा मिसायर उमेर अनुसारको निर्देशित मात्रामा थोपाको रूपमा सेवन गराउने विधीलाई स्वर्णविन्दु प्राशन भनिन्छ ।

आयुर्वेद स्वास्थ्य केन्द्रको आव २०८२/०८३ को वार्षिक कार्यक्रम अन्तर्गत बालबालिकाको सर्वाङ्गीण विकास तथा रोग प्रतिरोधात्मक क्षमता अभिवृद्धिको लागि लाभदायक स्वर्णविन्दु प्राशन कार्यक्रम मंगलबारको दिन दोश्रो पटक संचालन भएको थियो ।

बाह्र महिना देखि पाँच बर्षसम्मको बालबालिकालाई खालि पेटमा स्वर्णविन्दु प्राशन गराइन्छ । २८ दिनको अन्तरालमा स्वर्णविन्दु प्राशन गर्नु पर्ने शाष्त्रीय मान्यता रहि आएको छ । यसबाट उनीहरूको शारिरिक र मानसिक विकासको साथै रोग प्रतिरोधी क्षमता वृद्धि हुने गर्दछ ।
नेपाल सरकार स्वास्थ्य तथा जनसंख्या मन्त्रालयको स्वीकृत कार्यक्रम अन्तर्गत हरेक महिना पुष्य नक्षेत्रमा संचालन हुने गरी खुवाउने गरीन्छ ।

असोज महिनामा १ सय ८३ बालक र १ सय ४७ बालिका गरि जम्मा ३ सय ३० जना बालबालिकालाई स्वर्ण विन्दु सेवन गराइएको थियो भने मंगलबार २ सय १० बालक र १ सय २७ बालिका गरि जम्मा ३ सय ३७ जनालाई स्वर्णविन्दु सेवन गराईएको छ । दुई महिनाको अवधिमा जम्मा ६ सय ६७ जनालाई बालबालिकालाई स्वर्ण विन्दु सेवन गराइएको छ । त्यसैगरि स्वर्णविन्दु प्राशन गर्न छुटेकालाई मंसिर २२, पौष २१, माघ १८, फागुन १७, चैत १४, बैशाख १०, जेठ ०६ र असार ०३ गते स्वर्णविन्दु प्राशन गराउने तालिका रहेको जनाईएको छ ।