‎अभिनव कुमार पाठक

‎बर्दिया, मङ्सिर ४/ ‎रनिङ्ग शिल्ड तथा मेयरकप खेलकुद प्रतियोगिता नजिकिएसँगै गुलरिया नगरपालिकाका सबै विद्यालयमा तयारी सुरु भएको छ । रनिङ्ग शिल्ड प्रतियोगिताको लागि गुलरिया नगरपालिकाका सम्पुर्ण विद्यालयहरुमा मार्च पासको तिव्र गतिमा तयारी भईरहेको छ । गुलरिया नगरपालिकाको आयोजनामा रनिङ्ग शिल्ड प्रतियोगिता सोमबार देखि सुरु हुदैछ ।

रनिङ्ग शिल्ड खेलकुद प्रतियोगिता प्रत्येक वर्षको जस्तै गुलरिया नगरपालिका–४ खेलकुद मैदानमा हुनेछ । चार दिनसम्म चल्ने प्रतियोगितामा क्रिकेट, भलिबल, कबड्डी, एक सय मिटर दौड, २ सय मिटर दौड, ५ सय मिटरको दौड, २ हजार मिटरको दौड, मार्च पास र पिटी जस्ता खेलहरू हुनेछ । सबै विद्यालयले खेलाडी चयन गरेर अभ्यास गरिरहेका छन् ।

खेलकुद अभ्यासमा उत्साहजनक विद्यार्थीहरूको पनि सहभागिता रहेको देखिन्छ । गुलरिया नगरपालिका भित्र रहेका ५९ वटा विद्यालय मध्ये ५७ वटा विद्यालयले रनिङ्ग शिल्ड खेलकुद प्रतियोगितामा भाग लिने गुलरिया नगरपालिकाका शिक्षा शाखा प्रमुख सतिश कुमार यादवले बताए ।